काठमाडौं, कात्तिक ९ । दुर्लभ एकसिङ्गे गैँडाको पहिचान बोकेको जिल्ला चितवनमा आधारित क्रिकेट टोली ‘चितवन राइनोज’ले खेलकुदसँगै वन्यजन्तु संरक्षणमा पनि एक सराहनीय पहल थालेको छ। नेपाल प्रिमियर लिग (एनपिएल) को तेस्रो संस्करणमा होमिन लागेको यस क्लबले आफ्ना आधिकारिक टिसर्टलगायत सामग्री बिक्रीबाट आउने कुल आम्दानीको पाँच प्रतिशत रकम गैँडा संरक्षणमा खर्चिने घोषणा गरेको छ।
क्लबका अध्यक्ष आयुष न्यौपानेले आफ्नो नाम नै गैँडासँग जोडिएकाले यसको संरक्षणमा योगदान दिनु क्लबको मुख्य कर्तव्य रहेको बताएका छन्। चितवन मेडिकल कलेजको भगिनी संस्थाका रूपमा रहेको यो क्लबले आफ्नो लोगो र विभिन्न ब्रान्डिङमार्फत विश्वसामु चितवन राष्ट्रिय निकुञ्ज र यहाँको जैविक विविधताको प्रचार गर्दै आएको छ।
एनपिएलको पहिलो संस्करणमा चौथो स्थान र दोस्रोमा सातौँ स्थानमा सीमित भएको चितवन राइनोजले यसपटक भने उपाधि उचाल्ने कडा लक्ष्यसहित मैदानमा उत्रने तयारी गरेको छ। क्लबका निर्देशक प्रताप देवकोटाका अनुसार खेलप्रेमीहरूलाई एकै ठाउँमा जोड्न र समर्थन जुटाउन भरतपुरको वीरेन्द्र क्याम्पस चौर, विशाल चोक, दीपेन्द्र चोकलगायत जिल्लाका विभिन्न स्थानमा खेलको प्रत्यक्ष प्रसारण (लाइभ स्क्रिनिङ) को व्यवस्था गरिएको छ।
खेलकुद प्रवर्द्धनका साथै चितवन राइनोजले सामाजिक उत्तरदायित्वलाई पनि उत्तिकै प्राथमिकतामा राखेको छ। यसअघि स्थानीय खेल गतिविधिलाई सहयोग, भोटेकोशी बाढीपीडितलाई राहत तथा विभिन्न सांगीतिक कार्यक्रमहरूमा सहकार्य गर्दै आएको क्लबले अब वन्यजन्तु संरक्षणलाई पनि आफ्नो अभियानमा जोडेको छ। जिल्ला समन्वय समिति चितवनका प्रमुख नारायणप्रसाद अधिकारीले एनपिएलमा चितवनको प्रतिनिधित्व गर्ने यो क्लबले जिल्लाको पहिचानलाई राष्ट्रिय तथा अन्तर्राष्ट्रियस्तरमा चम्काउन ठूलो भूमिका खेलेको बताएका छन्।
आजदेखि सुरु हुने एनपिएलको तेस्रो संस्करणलाई लिएर अहिले सिङ्गो चितवनमा क्रिकेटको गज्जबको माहोल छाएको छ। सडकका पोल, होटल तथा रेस्टुरेन्टहरूमा फहराइएका चितवन राइनोजका झण्डाहरूले जिल्लामा खेलकुद उत्सवको रौनकता थप बढाएको छ।
