ललितपुर, कात्तिक ९ । ललितपुरको कुसुन्ती हाइटस्थित व्यस्त चक्रपथमा निर्माण गरिएको लिफ्टसहितको आधुनिक आकाशे पुल अब छिट्टै सञ्चालनमा आउने तयारीमा छ। पैदलयात्रीलाई सुरक्षित रूपमा सडक वारपार गराउन र दुर्घटनाको जोखिम घटाउने उद्देश्यले बनाइएको यस पुलको लागत करिब ४ करोड ६८ लाख रुपैयाँ रहेको छ।
यस पुलको सबैभन्दा ठूलो विशेषता यसमा राखिएको लिफ्ट सुविधा हो, जसले विशेषगरी अपाङ्गता भएका व्यक्ति, ज्येष्ठ नागरिक, ह्विलचेयर प्रयोगकर्ता तथा हिँडडुल गर्न कठिन हुने नागरिकलाई ठूलो राहत दिनेछ।
यद्यपि, निर्माण कार्यमा भएको केही ढिलाइले गर्दा सुरक्षित आवागमनको प्रतीक्षामा रहेका सर्वसाधारणले तत्काल लाभ लिन भने पाएका छैनन्। निर्धारित समयमा काम सम्पन्न नहुँदा यसको उपयोगिताबारे स्थानीयमा चासो र उत्सुकता बढेको छ। अब सम्बन्धित निकायले लिफ्टको प्राविधिक परीक्षण र सुरक्षा मापदण्ड पूरा गरी पुल कतिबेलादेखि खुला हुने हो, त्यसको स्पष्ट जानकारी दिनुपर्ने माग नागरिकस्तरबाट उठ्न थालेको छ। व्यस्त सडकमा जोखिमपूर्ण यात्रा गर्नुसाटो यो पुल पूर्ण रूपमा सञ्चालनमा आएपछि स्थानीयलाई आवतजावत गर्न निकै सहज हुने विश्वास गरिएको छ।
