वासिङ्टन डिसी, कात्तिक १० । अमेरिकाको भर्जिनियास्थित प्रिन्स विलियम काउन्टी अदालतमा चलिरहेको ममता काफ्ले भट्ट हत्याकाण्डको सुनुवाइमा अभियोजन सरकारी र बचाउ पक्षबीच फरेन्सिक प्रमाण, साक्षीका बयान र डिजिटल रेकर्डहरूमाथि तीव्र बहस भएको छ।
अदालतमा प्रस्तुत ११ जना प्रमुख साक्षीहरूको बयानका आधारमा सुनुवाइका मुख्य विवरणहरू यसप्रकार छन्:
आरा, रगत र कपडा दान गर्ने बाकस
आरा परीक्षण र प्रदर्शन: अपराधस्थल अनुसन्धानकर्ता (CSI) एन्ड्रिया फेल्डम्यान र क्याप्टेन स्टिफन लभिङले अदालतमा हरियो ‘रयोबी’ आराको कार्यविधि र सम्भावित प्रयोगबारे बयान दिए। परीक्षणका क्रममा आराको ह्यान्डल र भेन्ट नजिक रातो-खैरो दाग तथा कपालजस्ता रेशा भेटिएको र त्यसलाई फरेन्सिक ल्याबमा पठाइएको जानकारी दिइयो।
ब्लुस्टार परीक्षणको सीमा: अपराधस्थल अनुसन्धानकर्ता अलेक्जान्डर कर्डनरले घरको ग्यारेजको डस्टबिनमा ब्लुस्टार रसायन प्रयोग गर्दा नीलो चमक देखिएको बताए। तर, बचाउ पक्षको जिरहमा उनले यो रसायनले रगतबाहेक अन्य पदार्थसँग पनि प्रतिक्रिया दिन सक्ने र यसले रगत नै हो भनेर १०० प्रतिशत पुष्टि नगर्ने स्वीकार गरे।
कपडा दान गर्ने बाकस र गाडीको जाँच: चान्टिलीस्थित ग्यास स्टेसनबाहिर रहेको कपडा दान गर्ने बाकसबाट भेटिएका सेतो झोला, बाथ म्याट र नेपाली परम्परागत पोसाकजस्तो देखिने कपडाबारे अनुसन्धानकर्ताहरूले बयान दिए। यद्यपि, ती कपडा ममताकै थिए भन्ने निश्चित नभएको प्रहरीले जनाएको छ।
डिजिटल प्रमाण, खोज इतिहास र पानीको असामान्य खपत
गुगल सर्च र होम डिपो रेकर्ड: ह्वाइट हाउस मिलिट्री अफिसका ड्यानियल चार्ल्स मोरेका अनुसार अभियुक्त नरेश भट्टको कार्यसम्पादन सम्बन्धी गुगल खाताबाट “श्रीमतीको मृत्युपछि ऋणको अवस्था” र “पुनः विवाह गर्न कति समय कुर्नुपर्छ” भन्ने जस्ता विषय खोजिएको विवरण अदालतमा प्रस्तुत गरियो। यस्तै, होम डिपोका सुरक्षा अधिकारीले फेयरफ्याक्सको स्टोरबाट आरा, ब्लेड र ब्याट्री किट खरिद गरिएको सीसीटीभी फुटेज र रेकर्डबारे जानकारी दिए।
पानीको उच्च खपत: सार्वजनिक निर्माण विभागका सुपरिटेन्डेन्ट वेन मार्टिनका अनुसार जुलाई ३१, २०२४ मा नरेशको घरमा दुई घण्टामै १६० ग्यालनभन्दा बढी पानी प्रयोग भएको रेकर्ड छ। बचाउ पक्षले भने पाइप चुहिएको वा स्प्रिङ्कलरको समस्या हुन सक्ने दाबी गरेको छ।
ममताका चिनजानका व्यक्ति आशिष सङ्ग्रौला र दीपा ओलीले सन् २०२४ को सुरुवातदेखि नै दुवैबीच वैवाहिक सम्बन्ध बिग्रिएको र नरेशले फेसबुकमा पोस्ट गरेको सम्झिए। तर, बचाउ पक्षको जिरहमा दुवैबीच प्रत्यक्ष हिंसा भएको कसैले नदेखेको साक्षीहरूले स्वीकार गरे।
अभियोजन पक्षले औजार खरिद, पानीको प्रयोग, अनलाइन खोज र सम्भावित फरेन्सिक प्रमाणहरूलाई एउटै कडीमा जोडेर नरेशले नै हत्या गरेको प्रमाणित गर्ने प्रयास गरिरहेको छ। अर्कोतर्फ, बचाउ पक्षले प्रमाण संकलनमा प्रहरीको लापरबाही र परीक्षणको प्राविधिक सीमालाई मुख्य हतियार बनाएको छ।
आरोपी नरेश भट्टले आफू निर्दोष रहेको दाबी गर्दै आएका छन्। यस प्रकरणमा ममताको शव अझै फेला पर्न सकेको छैन। सम्पूर्ण साक्षी र प्रमाणको मूल्याङ्कन गरी जूरीले अन्तिम फैसला सुनाउनेछ।
