काठमाडौं, असोज २२ । नेपाली कांग्रेसको १५औँ महाधिवेशनअन्तर्गत नयाँ केन्द्रीय नेतृत्व चयनका लागि आज दिउँसो १ बजेदेखि मतदान हुने भएको छ। यसअघि बिहान ७ बजेका लागि तय गरिएको मतदान समय पटक–पटक सारिएपछि वर्षा तथा प्राविधिक कारणले दिउँसो १ बजेदेखि मतदान सुरु गर्न लागिएको केन्द्रीय निर्वाचन समितिले जनाएको छ।
केन्द्रीय निर्वाचन समितिका संयोजक एवं वरिष्ठ अधिवक्ता प्रेमबहादुर खड्काले संशोधित कार्यतालिकाअनुसार मतदान दिउँसोबाट सुरु हुने जानकारी दिए। समितिले महाधिवेशन प्रतिनिधिहरूलाई बिहानैदेखि मतदानस्थलमा लाइनमा नबस्न समेत आग्रह गरेको छ।
महाधिवेशनमा सहभागी ७ हजार २५५ जना प्रतिनिधिले नयाँ केन्द्रीय कार्यसमिति चयनका लागि मतदान गर्नेछन्। सभापति, उपसभापति, महामन्त्री, सहमहामन्त्री तथा केन्द्रीय सदस्य पदका उम्मेदवारहरूको अन्तिम नामावली निर्वाचन समितिले बुधबार साँझ सार्वजनिक गरिसकेको छ।
निर्वाचन व्यवस्थापनबारे छलफल गर्न निर्वाचन समितिले आज बिहान ११ः३० बजे सभापति, उपसभापति र महामन्त्री पदका सबै उम्मेदवारसँग राष्ट्रिय सभागृहस्थित निर्वाचन कार्यालयमा छलफल गर्ने जनाएको छ।
प्रदेश र समूहअनुसार छुट्टाछुट्टै मतदान केन्द्र
निर्वाचन समितिले महाधिवेशन प्रतिनिधिहरूको प्रदेश तथा प्रतिनिधित्वका आधारमा छुट्टाछुट्टै मतदान केन्द्रको व्यवस्था गरेको छ।
मतदान केन्द्र र प्रतिनिधि समूह :
राष्ट्रिय सभा गृह, मतदान केन्द्र ‘क’ — बागमती प्रदेश
खुलामञ्च, मतदान केन्द्र ‘ख’ — कोशी प्रदेश तथा तराई–मधेस समूह
हिमाल हल — गण्डकी प्रदेश
तराई–मधेस हल — मधेस प्रदेश
पहाड हल — लुम्बिनी, कर्णाली र सुदूरपश्चिम प्रदेश तथा नेपाली जनसम्पर्क समिति र भ्रातृ संस्थातर्फका प्रतिनिधि
निर्वाचन समितिले मतदानस्थलमा प्रवेश गरेपछि प्रतिनिधिहरूलाई आफूलाई तोकिएको प्रदेश वा समूहको मतदान केन्द्रमा गई मतदान गर्न आग्रह गरेको छ। मतदान गर्नुअघि प्रतिनिधिको परिचयपत्र र मतदाता नामावली रुजु गरिनेछ। निर्वाचन समितिका अनुसार मतदानस्थलमा मोबाइल फोनलगायत निर्वाचन आचारसंहिताले निषेध गरेका सामग्री लिएर प्रवेश गर्न पाइने छैन।
मतदानपछि मतगणना
कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनका लागि उम्मेदवारी दर्ता, दाबी–विरोध र उम्मेदवारी फिर्ताको प्रक्रिया पूरा भइसकेको छ। त्यसपछि निर्वाचन समितिले उम्मेदवारहरूको अन्तिम नामावली सार्वजनिक गरेको हो।
अब हुने मतदानबाट सभापति, उपसभापति, महामन्त्री, सहमहामन्त्रीसहित विभिन्न पदका केन्द्रीय सदस्य निर्वाचित हुनेछन्। १५औँ महाधिवेशनबाट विधान संशोधन गरी कांग्रेसको केन्द्रीय कार्यसमिति २९७ सदस्यीय बनाइएको छ। मतदान सकिएलगत्तै मतगणना सुरु गर्ने तयारी निर्वाचन समितिको छ। मतगणना सम्पन्न भएपछि निर्वाचन परिणाम सार्वजनिक गरिने समितिले जनाएको छ।
