काठमाडौं, असोज ३० । चितवन राष्ट्रिय निकुञ्जले पर्यटकका लागि अनलाइनबाटै प्रवेश टिकट लिन सकिने ई–टिकटिङ प्रणाली सुरु गरेको छ। यससँगै पर्यटकले घरबाटै टिकट खरिद गरी निकुञ्ज प्रवेशको प्रक्रिया पूरा गर्न सक्ने भएका छन्।
पहिलो चरणमा सौराहा क्षेत्रबाट अनलाइन टिकट खरिद गर्न सकिने व्यवस्था मिलाइएको निकुञ्जले जनाएको छ। परीक्षणको नतिजाका आधारमा अन्य प्रवेश बिन्दुमा समेत सेवा विस्तार गरिनेछ।
यसअघि टिकट लिन भौतिक रूपमा उपस्थित भई नगद भुक्तानी गर्नुपर्ने बाध्यता थियो। नयाँ प्रणालीले टिकट खरिदमा लाग्ने समय र झन्झट घटाउने अपेक्षा गरिएको छ।
बिहीबार चितवन क्षेत्र नम्बर १ का सांसद तथा राज्य व्यवस्था तथा सुशासन समितिका सभापति र निकुञ्जका वरिष्ठ संरक्षण अधिकृत दिलबहादुर पुर्जा पुनले संयुक्त रूपमा ई–टिकटिङ प्रणालीको उद्घाटन गर्नुभएको हो।
वरिष्ठ संरक्षण अधिकृत पुनका अनुसार निकुञ्जको करिब ७० देखि ७५ प्रतिशत राजस्व सौराहा क्षेत्रबाटै सङ्कलन हुने भएकाले पहिलो चरणमा यही क्षेत्रबाट सेवा सुरु गरिएको हो। शिवपुरी राष्ट्रिय निकुञ्जमा ई–टिकटिङ सेवा सुरु भएपछि चितवनमा पनि यसको आवश्यकता महसुस गरिएको उहाँले बताउनुभयो।
