काठमाडौं, असोज २९ । लक्ष्मी सनराइज क्यापिटल लिमिटेडको १६औँ वार्षिक साधारण सभाले आफ्ना शेयरधनीलाई चुक्ता पुँजीको ११ प्रतिशतका दरले पाँच करोड ३८ लाख रुपैयाँ नगद लाभांश वितरण गर्ने प्रस्ताव पारित गरेको छ । करसहितको उक्त लाभांश वितरण प्रस्ताव कम्पनीको वार्षिक साधारण सभाले अनुमोदन गरेको हो ।
कम्पनीको वार्षिक साधारण सभा बिहीबार काठमाडौंको हात्तीसारस्थित लक्ष्मी कम्प्लेक्समा सम्पन्न भएको हो । सभाले आर्थिक वर्ष २०८२÷०८३ को वार्षिक प्रतिवेदन, सोही आर्थिक वर्षको आषाढ मसान्तसम्मको वासलात, नाफा–नोक्सान हिसाब तथा नगद प्रवाह विवरणसम्बन्धी प्रस्तावहरू पारित गरेको छ । त्यसैगरी, आर्थिक वर्ष २०८३÷०८४ को लेखापरीक्षण कार्य सम्पन्न गर्न हाल कार्यरत लेखापरीक्षक एन.बी.एस.एम. एन्ड एसोसिएट्सलाई नै निरन्तरता दिने निर्णयसमेत सभाले गरेको छ ।
कम्पनीका अनुसार आर्थिक वर्ष २०८२/०८३ को आषाढ मसान्तसम्मको विवरणअनुसार प्रतिशेयर आम्दानी १२ रुपैंयाँ ६६ पैसा रहेको छ । वितरणयोग्य आम्दानी १२ दशमलव ८६७ प्रतिशत रहेको अवस्थामा सोही आम्दानीबाट शेयरधनीलाई चुक्ता पुँजीको ११ प्रतिशत नगद लाभांश वितरण गर्ने निर्णय गरिएको हो ।
नेपालको पुँजी बजारको इतिहासमा शेयर निष्काशनसम्बन्धी मर्चेन्ट बैंकिङ तथा सामूहिक लगानी कोषसम्बन्धी कार्यको सुरुवात गर्ने अग्रणी संस्थामध्ये एक रहेको लक्ष्मी सनराइज क्यापिटलले तीन दशकभन्दा बढी समयदेखि नेपालको धितोपत्र बजारको विकास, विस्तार तथा संस्थागत सुदृढीकरणमा महत्त्वपूर्ण योगदान पु¥याउँदै आएको छ ।
कम्पनीले हाल करिब छ अर्ब रुपैयाँ बराबरका छवटा बन्दमुखी म्युचुअल फण्ड र एउटा खुलामुखी म्युचुअल फण्ड सञ्चालन गर्दै आएको छ । यसरी कम्पनीको म्युचुअल फण्ड व्यवस्थापनअन्तर्गत कुल करिब सात अर्ब रुपैयाँ बराबरको लगानी रहेको छ । यसका अतिरिक्त, विशिष्टीकृत लगानी कोषअन्तर्गत एक अर्ब रुपैयाँ पुँजी भएको ‘लक्ष्मी सस्टेनेबल इनर्जी फण्ड’ ले निर्धारित लक्ष्यअनुरूप पुँजी संकलन गरी दिगो ऊर्जाका विभिन्न क्षेत्रमा लगानी गर्दै आएको कम्पनीले जनाएको छ। यस पहलले नवीकरणीय तथा दिगो ऊर्जा क्षेत्रको विकासमा लगानी परिचालन गर्ने कम्पनीको प्रतिबद्धतालाई प्रतिबिम्बित गर्दछ ।
लक्ष्मी सनराइज क्यापिटल लिमिटेड इम्प्याक्ट प्रिन्सिपल्स फर इम्प्याक्ट म्यानेजमेन्टमा हस्ताक्षर गर्ने नेपालकै पहिलो संस्था पनि हो। यो विश्वव्यापी पहलले सामाजिक तथा वातावरणीय प्रभावलाई समेत ध्यानमा राख्दै लगानी प्रक्रियालाई पारदर्शी, अनुशासित र विश्वसनीय बनाउने लक्ष्य राखेको छ । उक्त पहलमा कम्पनीको सहभागिताले दिगो तथा उत्तरदायी लगानीप्रतिको प्रतिबद्धता झल्काउनुका साथै नेपालको पुँजी बजारमा जिम्मेवार लगानी अभ्यासको प्रवद्र्धनमा समेत योगदान पु¥याउने अपेक्षा गरिएको छ ।
यसरी, नगद लाभांश वितरण, म्युचुअल फण्ड व्यवस्थापन तथा दिगो ऊर्जामा लगानी विस्तारमार्फत लक्ष्मी सनराइज क्यापिटलले नेपालको पुँजी बजारको विकाससँगै दीर्घकालीन तथा जिम्मेवार लगानी प्रवद्र्धनमा आफ्नो भूमिका निरन्तर अगाडि बढाउँदै आएको छ ।
