काठमाडौं, असोज २९ । नेपाली कांग्रेसको १५औँ महाधिवेशनअन्तर्गत केन्द्रीय कार्यसमिति चयनका लागि भइरहेको मतगणनाको सम्पूर्ण परिणाम आज बेलुकीसम्म सार्वजनिक हुने भएको छ। निर्वाचन समितिका सदस्यसचिव राजु कटुवालका अनुसार आज बेलुकीसम्म सबै पदको अन्तिम मतपरिणाम आउनेछ। कांग्रेसको नयाँ नेतृत्व चयनका लागि सभापति, उपसभापति र महामन्त्री पदको मतगणना भने यसअघि नै सम्पन्न भइसकेको छ।
सहमहामन्त्री र केन्द्रीय सदस्यहरूका केही क्लस्टरबाहेक अधिकांश समूहको मतगणना सम्पन्न भइसकेको छ भने बाँकी मतको गणना पनि धमाधम भइरहेको छ। निर्वाचन समितिले मतगणनालाई तीब्रता दिँदै आजै सबै परिणाम सार्वजनिक गर्ने तयारी गरेको छ।
मुख्य पदाधिकारीहरूको निर्वाचन परिणाम:
सभापति: गगनकुमार थापा (कुल खसेको ७,०१३ मतमध्ये ६,५८४ मत प्राप्त गरी ९४.६% मतसहित निर्वाचित। प्रतिस्पर्धी श्यामकृष्ण खड्गीले ३७५ मत प्राप्त गरे।)
वरिष्ठ उपसभापति: विश्वप्रकाश शर्मा (निर्वारोद)
उपसभापति (महिला): पुष्पा भुसाल (निर्वारोध)
उपसभापति (खुला): डा. चन्द्रकान्त भण्डारी (५३.१%) र ई. मधु आचार्य (३३%)
उपसभापति (समावेशी): विनोदकुमार चौधरी (२४.८%)
महामन्त्री (खुला): प्रदीप पौडेल (५९.६%) र उदयशमशेर राणा (३२.८%)
महामन्त्री (महिला): डिला संग्रौला (४४.३%)
सहमहामन्त्री:
खुला: रामहरि खतिवडा र अजयबाबु शिवाकोटी
महिला: प्रतिमा गौतम
आदिवासी जनजाति: बहादुर सिंह लामा
पिछडिएको क्षेत्र: जीवनबहादुर शाही
निर्वाचन समितिले पार्टीको केन्द्रीय कार्यालय सानेपामा विभिन्न टोली बनाई मतगणना गरिरहेको छ। गत असोज १८ गतेदेखि सुरु भएको यस महाधिवेशनको मतदान असोज २३ गते भएको थियो। सभापतिको परिणाम २४ गते बिहान आए पनि अन्य पदको गणना केही ढिलो हुँदा पूर्ण नतिजा आउन समय लागेको हो। बाँकी समूहको मतगणना पनि आजै साँझसम्म सकिने समितिले जनाएको छ।
