काठमाडौं, असोज २२ । राष्ट्रिय स्वतन्त्र पार्टी (रास्वपा) कि सांसद आशिका तामाङले आफ्ना गैर-हिन्दू श्रीमान् थोमसलाई पशुपतिनाथको मूल मन्दिरभित्र छिराएको भन्ने हल्लाको कडा खण्डन गरेकी छन्। सामाजिक सञ्जालमार्फत स्पष्टीकरण दिँदै उनले आफ्ना श्रीमान् मन्दिरको ढोकासम्म मात्र पुगेका र धार्मिक नियम अनुसार भित्र जाने अनुमति नभएकाले बाहिरै रोकिएको बताएकी छन्।
सुरक्षाकर्मीहरूसँगको कुराकानी उद्धृत गर्दै तामाङले विगतमा भारतीय कंग्रेसकी नेत्री सोनिया गान्धी आउँदा समेत मूल मन्दिरमा प्रवेश नदिइएको प्रसङ्ग उल्लेख गरेकी छन्। देशको संविधान जस्तै हरेक धर्म र आस्थाका पनि आफ्नै नियम-विधान हुने भएकाले त्यसलाई सबैले सकारात्मक रूपमा सम्मान गर्नुपर्ने उनको भनाइ छ। मन्दिरभित्र आफू एक्लै गएर पूजापाठ गरेको र पुजारीले थोमसका लागि दिएको प्रसाद, खादा, टीका र माला बाहिर ल्याएर लगाइदिएको स्पष्ट पार्दै उनले थोमसलाई बुढेसकालमा अनावश्यक रूपमा भाइरल नबनाइदिन पनि आग्रह गरेकी छन्।
“थोमस लाई यो बुढेसकालमा पनि कति भाइरल बनाइरहनुभएको होला , पशुपतिनाथको ढोकासम्म मात्रै उहाँ पुग्नुभएको हो, भित्र छिर्ने अनुमती थिएन जुन भारतकी काङ्ग्रेस पार्टीकी नेत्री सोनिया गान्धी नेपाल को पशुपतिनाथ आउँदा पनि छिर्नलाई अनुमति थिएन, भन्ने कुरा मलाई त्यही दिन सुरक्षाकर्मीहरूबाट थाहा भयो, आफ्नो आफ्नो धर्मको नियम हुन्छ, संविधानका विधान जस्तै धर्म का पनि विधानहरू हुन्छन् , जसलाई हामीले सकारात्मक रुपमा लिनुपर्छ! म मात्र मन्दिर भित्र गएको हुँ, पुजारीज्यूले मलाई माला, खादा र टिका दिनु भयो र थोमसको लागि पनि छुट्टै भाग दिनुभयो र म बाहिर आइसकेपछि थोमसलाई मैले माला र टीका लगाइदिएको हु”
