काठमाडौं, असोज २२ । नेपाली कांग्रेसका सभापति गगनकुमार थापाले पार्टीको १५औँ महाधिवेशनको बन्दसत्र समापन कार्यक्रममा बोल्दै पार्टीको मूल्य-मान्यता कमजोर भएको अवस्थामा त्यसलाई सुधार्न र बदल्न आफू अडिग रहेको स्पष्ट पारेका छन्।
भदौ २३ र २४ गतेको घटनाक्रमपछि नयाँ पार्टी गठन गरेर नेतृत्व सम्हाल्ने प्रस्ताव आए पनि आफूले १४ वर्षदेखि झन्डा बोकेको कांग्रेसलाई नै रुपान्तरण गर्ने बाटो रोजेको उनले बताए। कांग्रेसलाई एउटा परिवारका रूपमा बुझ्नुपर्ने धारणा राख्दै उनले सार्वभौम शक्ति तलका कार्यकर्तामा निहित हुने भएकाले भुइँमा बस्ने कार्यकर्ता र आफ्नो अधिकार बराबर रहेको उल्लेख गरे।
महाधिवेशनपछि आफूले २० प्रतिशत समय मात्रै आन्तरिक राजनीतिमा दिने र बाँकी ८० प्रतिशत समय बाहिर जनताबीच बहस गर्न खर्चिने प्रतिबद्धता जनाउँदै थापाले युवाको बाहुल्य रहेको मुलुकमा पुराना दलप्रतिको वितृष्णा चिर्दै कांग्रेसलाई पुनः सान्दर्भिक बनाउनुपर्ने चुनौती औँल्याए।
असन्तुष्ट नेताहरूलाई पार्टीमा फर्कन र अदालत जाने क्रम रोक्न आग्रह गर्दै उनले सदस्यता र अधिवेशनका क्रममा भएका त्रुटिहरूलाई न्यायोचित तरिकाले समाधान गरिने आश्वासन दिए। नेता व्यवस्थापनका लागि नभई पाँच पुस्ता जोड्न र सांगठनिक ‘जाम’ खुलाउन विधान संशोधन गरिएको स्पष्ट पार्दै उनले आगामी दिनमा वडा स्तरबाटै केन्द्रीय सभापति छान्ने गरी पार्टीको आन्तरिक लोकतन्त्रलाई थप सुदृढ बनाइने बताए।
