मुम्बई , असोज २२ । बलिउडका दिग्गज अभिनेता नाना पाटेकरको ७५ वर्षको उमेरमा निधन भएको छ। उनको अक्टोबर ८ को बिहान गोवास्थित निवासमा हृदयघातका कारण निधन भएको जनाइएको छ।
चिकित्सकका अनुसार नाना पाटेकर अचानक अचेत भएपछि उनका साथी र हेरचाहमा खटिएका व्यक्तिले उपचारका लागि अस्पताल लैजाने प्रयास गरेका थिए। अस्पताल पुर्याएपछि चिकित्सकहरूले करिब ४५ मिनेटदेखि एक घण्टासम्म कार्डियाक मसाज र सीपीआरमार्फत उनलाई बचाउने प्रयास गरेका थिए। तर, चिकित्सकहरूको प्रयास सफल हुन सकेन।
उनको निधनपछि गोवा मेडिकल कलेजमा शव परीक्षणको प्रक्रिया अघि बढाइएको थियो। त्यसपछि उनको पार्थिव शरीर महाराष्ट्र लैजाने तयारी गरिएको जनाइएको छ। साथै, नाना पाटेकरको अन्त्येष्टि पूर्ण राजकीय सम्मानका साथ गरिने घोषणा गरिएको छ।
करिब पाँच दशक लामो अभिनय यात्रामा नाना पाटेकरले भारतीय सिनेमामा थुप्रै अविस्मरणीय भूमिका निर्वाह गरेका थिए। गम्भीर तथा प्रभावशाली चरित्रका लागि चर्चित उनी हास्य भूमिकामा पनि उत्तिकै लोकप्रिय थिए।विशेषगरी ‘वेलकम’ र ‘वेलकम ब्याक’ जस्ता चलचित्रमा उनको हास्य अभिनय र संवाद प्रस्तुतिले दर्शकको मन जितेको थियो। ‘वेलकम’मा उनले निर्वाह गरेको उदय शेट्टीको भूमिका बलिउडका चर्चित हास्य पात्रमध्ये एक मानिन्छ।
नाना पाटेकरले बलिउडमा अभिनयसँगै निर्देशन र सामाजिक क्षेत्रमा समेत आफ्नो छुट्टै पहिचान बनाएका थिए। उनको निधनसँगै भारतीय चलचित्र क्षेत्रमा एउटा प्रभावशाली अभिनय अध्यायको अन्त्य भएको छ।
