काठमाडौं, असोज २३ । देशका विभिन्न प्रदेशका हिमाली तथा पहाडी भू-भागमा आज वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।
महाशाखाका अनुसार आज दिउँसो कोशी, बागमती, गण्डकी तथा सुदूरपश्चिम प्रदेशका पहाडी र हिमाली भू-भागका केही स्थानमा मेघगर्जन तथा चट्याङसहित मध्यम वर्षा हुने सम्भावना छ। साथै, उच्च पहाडी तथा हिमाली क्षेत्रमा हिमपात हुन सक्ने पूर्वानुमान गरिएको छ।
आज राति पनि कोशी, बागमती र गण्डकी प्रदेशका पहाडी तथा हिमाली भू-भागका केही स्थानमा वर्षा तथा हिमपातको सम्भावना रहेको छ। अन्य प्रदेशका पहाडी तथा हिमाली क्षेत्रका केही स्थानमा समेत मौसम बदली भई वर्षा तथा हिमपात हुन सक्ने महाशाखाले जनाएको छ।
मौसममा हुने परिवर्तनका कारण पहाडी क्षेत्रमा पहिरो तथा साना नदी र खोलामा जलसतह बढ्न सक्ने जोखिम रहेकाले आवश्यक सतर्कता अपनाउन सम्बन्धित निकायले आग्रह गरेको छ।
