काठमाडौं, असोज १९ । साताको पहिलो सेयर कारोबार दिन सोमबार नेपाल स्टक एक्सचेन्ज (नेप्से) परिसूचक दोहोरो अंकले घटेर बन्द भएको छ। नेप्से परिसूचक २०.४८ अंकले घटेर २५६६.७६ विन्दुमा ओर्लिएको छ।
सोमबार ३५९ वटा कम्पनी (स्क्रिप्स) को ९० लाख ३ हजार ३८८ कित्ता सेयर ३ अर्ब २७ करोड ९५ लाख ९ हजार ८३६ रुपैयाँमा खरिदबिक्री भए। कारोबारमा आएकामध्ये ३२ वटा कम्पनीको सेयर मूल्य बढ्दा २४२ वटाको घटेको छ भने ४ वटा कम्पनीको मूल्य स्थिर रहेको छ।
बजारमा दोहोरो अंकको गिरावट आउँदा कुनै पनि कम्पनीको सेयर मूल्यमा सकारात्मक सर्किट लाग्न सकेन। यस दिन १०.३० प्रतिशत स्ट्याण्डर्ड चार्टर्ड बैंक लिमिटेड डिबेन्चरको सेयर मूल्य सर्वाधिक ५.७५ प्रतिशतले बढेको छ।
कारोबार रकमका आधारमा २२ करोड रुपैयाँ बराबरको सेयर कारोबार गर्दै घलेम्दी हाइड्रोपावर शीर्ष स्थानमा रह्यो। यस्तै, हाथवे इन्भेस्टमेन्ट नेपाल र शिवम् सिमेन्टले समान ८/८ करोड तथा हिमालयन डिस्टिलरी र पिपुल्स हाइड्रोपावरले समान ७/७ करोड रुपैयाँको सेयर कारोबार गरेका छन्।
समूहगत उपसूचकतर्फ ट्रेडिङ समूहबाहेक अन्य सबै समूहका उपसूचकमा गिरावट आएको छ।
