आमनिर्वाचनको मतगणना र नतिजा आउने क्रम सकिएको छैन । मतगणना सकिएर अन्तिम नतिजा आउन केही दिन अझै लाग्ने देखिन्छ । तर अहिलेसम्मको नतिजाले सबैभन्दा ठूलो दल नेपाली काँग्रेसलाई बनाएकोले आगामी सरकार नेपाली काँग्रेसकै नेतृत्वमा बन्ने देखिन्छ । काँग्रेसले एकल बहुमत नल्याएपनि सत्ता गठबन्धनका दलहरु मिल्दा झिनो बहुमत पुग्ने सम्भावना जीवितै छ ।
संघीय संसदको पहिलो दलको हैसियतले नयाँ सरकार बनाउने जिम्मेवारी सबैभन्दा पहिला नेपाली काँग्रेसले नै पाउने छ । काँग्रेसको नेतृत्वमा मिलिजुली सरकार बन्ने करिबकरिब निश्चित छ । निश्चित नभएको चाहिँ अबको प्रधानमन्त्री को ? भन्ने नै हो । वर्तमान प्रधानमन्त्री शेरबहादुर देउवादेखि वरिष्ठ नेता रामचन्द्र पौडेलसम्म, युवा नेता गगन थापादेखि पाका नेता डा. शेखर कोइरालासम्म भावी प्रधानमन्त्रीको रुपमा चर्चा चलाइएका नाम हुन् । यी नाममध्ये वरिष्ठ नेताको हिसाबले सबैभन्दा बढी सम्भावना पौडेलकै देखिन्छ ।
नेकपा एमालेका उम्मेदवारलाई हराउँदै कांग्रेसका वरिष्ठ नेता पौडेल तनहुँ–१ बाट प्रतिनिधिसभा सदस्यमा निर्वाचित भएसँगै छैटौंपटक निर्वाचित हुने थोरै नेताको संख्यामा पौडेल परेका छन् । यो जितसँगै काँग्रेसका वरिष्ठ नेता पौडेल प्रधानमन्त्रीको दौडमा सामेल भएका छन् । काँग्रेसी नेता तथा कार्यकर्ताले पौडेललाई भावी प्रधानमन्त्रीका रुपमा हेर्न थालेका छन् ।
चुनाव जितेर पौडेलले सरकारको नेतृत्वमा दावी गर्ने पृष्ठभूमि तयार पारेका छन् । चुनावी अभियानकै क्रममा तनहुँ पुगेर सत्ता साझेदार नेकपा माओवादी केन्द्रका अध्यक्ष प्रचण्डले पौडेलले सरकारकै नेतृत्व गर्ने सम्भावना रहेको सार्वजनिक मन्तव्य दिएका थिए । यसले पनि पौडेललाई प्रधानमन्त्रीमा दावा गर्ने वातावरण बनाएको छ ।
पटकपटक प्रधानमन्त्रीको उम्मेदवार
विगत हेर्दा पनि पौडेल प्रधानमन्त्रीका दावेदार मात्रै नभएर धेरैपटक निवेदन दिएर चर्चाकै पात्र बनेका थिए । २०६४ सालको पहिलो संविधानसभामै पौडेल दलका नेता बनेका थिए । सुशील कोइराला बाँकेबाट पराजित हुँदा तनहुँ–२ बाट चुनाव जितेका पौडेललाई तत्कालीन सभापति गिरिजाप्रसाद कोइरालाले संसदीय दलका नेता बनाएका थिए ।
संविधानसभाको चुनावपछि सरकार प्रचण्डको नेतृत्वमा बन्यो । तर प्रचण्डले ९ महिनामै प्रधानमन्त्रीबाट राजीनामा दिए । प्रचण्डपछि एमालेका माधवकुमार नेपाल प्रधानमन्त्री भए । माधवको राजीनामापछि नयाँ सरकारको खोजीमा कांग्रेस संसदीय दलको नेताका रुपमा पौडेलले प्रधानमन्त्रीमा दाबी गरे । प्रचण्डविरुद्ध पौडेलले गरेको दाबीमा एमाले तटस्थ बस्दा प्रधानमन्त्रीका लागि बहुमत पुगेन । पौडेल १७ पटकसम्म प्रधानमन्त्रीको उम्मेदवार भए । अहिले उनै प्रचण्डले भावी प्रधानमन्त्रीका रुपमा पौडेललाई अघि सार्दै सार्वजनिक मन्तव्य दिइनु अर्थपूर्ण छ ।
२०७० सालको चुनावमा भने सुशील कोइरालाले चुनाव जिते, गिरिजापछि पार्टी सभापति जितेका सुशील नै प्रधानमन्त्री भए । सुशीलको निधनपछि पौडेल कार्यवाहक सभापति भए । तर १३औं महाधिवेशनमा पौडेललाई हराउँदै देउवाले पार्टी सभापति जिते, दलको नेतामा प्रकाशमान सिंहलाई हराए । देउवा अहिले प्रधानमन्त्री छन् । अबको प्रधानमन्त्री देउवा हुने सम्भावना निकै कम छ ।
पौडेल प्रधानमन्त्री बन्ने आधार
पटकपटक प्रधानमन्त्री बनिसकेका देउवाको विकल्पमा पौडेल नै उत्तम उम्मेदवार हुन् प्रधानमन्त्रीका लागि । के वरिष्ठ नेता पौडेल प्रधानमन्त्री बन्ने आधार तयार भएको छ त ? तयार भएको छ भने केके हुन् ती आधार ?
हो, अबको प्रधानमन्त्री रामचन्द्र पौडेल बन्ने केही आधार तयार भएका छन् । पहिलो आधार भनेको अहिलेको चुनावी गठबन्धनको सूत्रधार भएकोले पौडेलको दाबी स्वाभाविक छ । उनी गठबन्धनमा सामेल दलका नेताहरु प्रचण्ड र माधवकुमार नेपालको पहिलो रोजाई हुन् । अर्कोतिर पार्टीभित्र सन्तुलन मिलाउने हिसाबले शेखर कोइराला समूहको लागि पनि देउवाको विकल्प पौडेल नै हुन् ।
बेदागी, निष्ठावान, समाजवादी नेता भएकोले अहिलेको राजनीतिक वितृष्णालाई मलहम हुने पात्र हुन् पौडेल । प्रधानमन्त्रीमै चर्चा गरिएका गगन थापालाई पहिलोपटक गिरिजासँग झगडा गरेर पौडेलले नै सांसद बनाएकोले त्यो गुन थापाले तिर्ने चर्चा चलेको छ । सात दशकको राजनीतिक जीवन र १४ वर्ष जेल बसेको विगतले पनि पौडेललाई एक पटक मुलुकको कार्यकारी बनाउने सम्भावना धेरै देखिन्छ ।
नेतृत्व दाबीमा लगातार असफल भइरहेका पौडेलसामू फेरि अनुकुल राष्ट्रिय राजनीतिक कोर्ससँगै जनअनुमोदन समेत प्राप्त भएको छ । स्वयं पौडेलले पनि खुलेर यसपटक प्रधानमन्त्री बन्ने आफ्नो सपना सुनाउने गरेका छन् । यसैको तयारीका लागि चुनाव जिते लगत्तै पौडेल राजधानी पुगेका छन् । अब हेर्नु छ, पौडेलको राजनीतिक यात्राले कुन मोड पाउने छ ?
