शेषकान्त पन्डित
काठमाडौँ ३१ भदौ
काँग्रेसको कार्यबाहक सभापति, संसदीय दलको नेता, सभामुख र उपप्रधानमन्त्री जस्ता गरिमामय पद सम्हालिसकेका नेता रामचन्द्र पौडेल यतिखेर तीन वटा मुख्य मिसनका साथ अघि बढेका छन् । कुनै मिसन उनले सार्वजनिक छन् कुनैमा उनी खुलेका छैनन् । तर पौडेललाई नजिकबाट चिन्नेहरु उनी तीन वटै विकल्प खुला गरेर राजनीतिमा क्रियाशील रहेका बताउँछन् ।
१. पहिलो नजर
पौडेलको सबैभन्दा पहिलो नजर आगामी प्रधानमन्त्री हो । धेरै वर्ष सरकार र सत्तामा बसे पनि मुलुकको मुख्यकार्यकारी भूमिकामा नपुगेको र आफूमाथि अन्याय भएको पौडेलले सार्वजनिक फोरमहरुमा बताउँदै आएका छन् । जवानीका धेरै वर्ष जेलनेलमा विताएका पौडेल राजनीतिको उत्तरार्धमा सिंहदरबारमा एक थान तस्बिर राख्ने मुडमा छन् । जिल्लामा निर्वाचन नलड्न पार्टीका समर्थक, शुभेच्छुकले गरेको आग्रहलाई पन्छाउँदै पौडेल यसपटक पुरानै थातथलोबाट निर्वाचन जितेर सिहदबारको यात्रा गर्ने सपना बाँडिरेहका छन् । तनहुँवासीको मुहारमा खुशी बाँड्न नसके पनि यसपटक पौडेल निर्वाचनमा बिजयी हुने सम्भावना छ । यसले उनको पहिलो ढोका खुल्नेछ ।
२. दोस्रो नजर
पहिलो मिसनले ठीक दिशा लिन नसके पौडेलको दोस्रो नजर शितल निवासको यात्रा हो । यद्यपि उनले यसलाई स्वीकारेका छैनन् । प्रधानमन्त्रीमा सशक्त दावेदारी प्रस्तुत गर्न सकिए मात्र शितलनिवासको यात्रा सहज हुन सक्छ भन्ने उनको भित्री बुझाइ हुनुपर्छ । पार्टीले अन्तिम समयमा प्रस्ताव गरे मन अमिलो पारेर भए पनि पौडेलले शितल निवासको प्रस्ताव पक्कै अस्वीकार गर्ने छैनन् । राजनीतिमा सामान्य जानकारी राख्नेहरु पनि पौडेललाई भावी राष्ट्रपतिकै रुपमा हेरेको देखिन्छ । तनहुँबाट निर्वाचन जिते या हारे पनि पौडेल शितल निवास पुग्नेछन् । यस अवस्थामा मुलुकले एक परिपक्क राष्ट्रपति पाउनेछ र पौडेल ८४ वर्षको उमेरमा शितलनिवासबाट बोहराटारमा फर्कनेछन् ।
३. तेस्रो नजर
राजनीतिमा सम्भावनाका सबै ढोका खुल्ला नै रहन्छन् भनिन्छ पौडेलका लागि तेस्रो ढोका पनि खुल्लै रहने आकलन गरिएको छ । पार्टीभित्रको राजनीतिक समीकरण राम्ररी बुझेका पौडेलले नयाँ ढोका खुल्ने सम्भावना देखेको हुनुपर्छ । सभापतिमा शेरबहादुर देउवा दोस्रो कार्यकालका लागि निर्वाचित भएका छन् । समयमा क्रममा कतै देउवाले पौडेललाई नै वीचमा सभापतिको जिम्मेवारी दिने या आगामी सभापतिको उम्मेदवारमा समर्थन गर्छन् की भन्ने आशा पौडेलको हुन सक्छ । पार्टी सभापतिको निर्वाचनपछि बोहोराटार पुगेर देउवाले तपाईको स्वास्थ्य अवस्था ठीकठाक राख्नुस् मुलुकलाई तपाईको अझै खाँचो छ भनेको कुरा पौडेलले भुल्ने कुरै भएन । यसैले हुनुपर्छ तनहुँका गाउँ गाउँमा पैदल यात्रा गरेर पौडेलले आफू ठीकठाक रहेका सन्देश हालै मात्र दिइसकेका छन् ।
