काठमाडाैं । राष्ट्रिय स्वतन्त्र पार्टी (रास्वपा) का अध्यक्ष रवि लामिछाने र काठमाडौं महानगरपालिकाका मेयर बालेन्द्र (बालेन) शाहबीच सात बुँदे सहमति भएको छ ।
रवि लामिछाने पार्टीका केन्द्रीय अध्यक्षकै रूपमा रहने र आगामी प्रतिनिधि सभा निर्वाचनका लागि बालेन्द्र शाह प्रधानमन्त्री पदका उम्मेदवार हुने सहमति भएको छ । आइतबार बिहान ४ बजेतिर भएको सहमतिमा रास्वपा अध्यक्ष रवि लामिछाने र मेयर शाहले हस्ताक्षर गरेका थिए । सहमति भएसँगै बालेन रास्वपाको नेतृत्व तहमा रहने निश्चित भएको हो ।
सो समयमा रास्वपाका नेता डा स्वर्णिम वाग्ले, डीपी अर्याल, शिशिर खनाल र असिम शाहको उपस्थिति थियो । बलेन शाहको तर्फबाट कुमार व्यञ्जनकार, निश्चल बस्नेत, भूपदेव शाहलगायतको उपस्थिति थियो ।
सम्झौता अनुसार, युवाहरूले चलाएको भ्रष्टाचार र कुशासन विरुद्धको आन्दोलनको स्वामित्व रहनेछ र घाइते र शहीद परिवारको मागलाई उचित रूपमा सम्बोधन गरिनेछ । राजनीतिक दलको नाम र यसको चुनाव चिन्ह राष्ट्रिय स्वतन्त्र पार्टी नै रहनेछ ।
यस्ता छन् सात बुँदे सहमति –
१. नवयुवाहरुले भ्रष्टाचार र कुशासन विरुद्ध गरेको आन्दोलनको अपनत्व लिंई, घाईते तथा शहिद परिवारका मागहरुको यथोचित सम्वोधन गर्ने प्रतिवद्वता जनाउँने।
२. समुन्नति र सामाजिक न्यायका राष्ट्रिय उद्देश्यहरुका लागि गरिनु पर्ने गहिरा नीतिगत, संस्थागत एवं संरचनात्मक सुधारहरु मार्फत आर्थिक-सामाजिक उन्नयन र सुसंस्कृत राजनीतिक अभ्यासको जगमा अर्को दश वर्षभित्र नेपाललाई सम्मानजनक मध्यम-आय भएको राष्ट्र बनाउने मार्गचित्रको इमान्दार कार्यान्वयनप्रति समर्पित हुने।
३. पहिलो पक्ष र दोश्रो पक्षबीच बृहत् एकता भए पश्चात् स्थापित हुने राजनीतिक दलको नाम ‘राष्ट्रिय स्वतन्त्र पार्टी, दलको झण्डा साविककै निलो पृष्ठभूमिको मध्य भागमा सेतो रङ्गको गोलाकार बीचमा निलो रङ्गको घण्टीको आकृति, दलको चुनाव चिन्ह ‘घण्टी र केन्द्रीय कार्यालय काठमाडौँ उपत्यकामा रहने।
४. राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने।
५. बृहत् एकता पश्चात् पार्टीको संगठनात्मक संरचनालाई थप सक्षम र फराकिलो बनाउन युवा अभियन्ता एवं अनुभवी विज्ञहरुलाई समुचित समायोजन गर्दै जिम्मेवारी तोक्दा योग्यता, समावेशिता र सार्वजनिक छविलाई आधार मान्ने।
६. आसन्न आमनिर्वाचन लगत्तै यस सम्झौता बमोजिम राष्ट्रिय स्वतन्त्र पार्टी सम्बन्धी दस्तावेज निर्वाचन आयोगमा अद्यावधिक गर्ने।
७. राष्ट्रिय स्वतन्त्र पार्टीको सिद्धान्त, नेतृत्व र चुनाव चिन्ह ‘घण्टी’ मा गोलबद्ध भइ लोकतान्त्रिक सुशासन, समुन्नति र सामाजिक न्यायका मुद्धा अघि बढाउन अन्य सुसंस्कृत एवं परिवर्तनकामी वैकल्पिक राजनीतिक शक्ति, समूह र व्यक्तिहरुलाई आव्हान गर्ने।
