पर्सा । पर्साको वीरगञ्जमा मस्जिद तोडफोडको विरोधमा भएको प्रदर्शनका क्रममा आइतबार प्रहरी र प्रदर्शनकारीबीच झडप भएको छ। आइतबार बिहानैदेखि मुस्लिम समुदायले बिहानैदेखि सडकमा टायर बालेर प्रदर्शन गरेका छन्। स्थिति नियन्त्रणमा लिन प्रहरीले ५ राउन्ड अश्रुग्यास प्रहार गरेको छ।
घण्टाघर, मुर्ली, मालपोत चोक र छपकैया इदगाह चोक क्षेत्रमा उनीहरूले नाराबाजी गर्दै सडक अवरुद्ध गरेका थिए। छपकैया इदगाह चोकमा प्रदर्शन उग्र बनेपछि प्रहरीसँग सामान्य झडप भएको थियो। जिल्ला प्रहरी कार्यालय पर्साका प्रमुख प्रहरी उपरीक्षक सुदीपराज पाठकका अनुसार केहीबेर तनावको अवस्था बने पनि अहिले स्थिति नियन्त्रणमा आएको छ।
शनिबार धनुषाको धनुकमला नगरपालिका–६, सखुवा मरानस्थित एक मस्जिदमा अज्ञात समूहले तोडफोड गरेको थियो। उक्त घटना सामाजिक सञ्जालमार्फत फैलिएपछि वीरगञ्जमा पनि विरोध प्रदर्शन भएको हो। प्रदर्शनमा सहभागी अगुवाहरूले मस्जिद तोडफोडमा संलग्नलाई तत्काल पक्राउ गरी कडा कारबाही गर्न माग गरेका छन्।
