काठमाडौं । करिब १.४ देखि १.५ अर्ब रुपैयाँ करदाताको लगानीमा निर्माण गरिएको दमक भ्यु टावर प्रयोगविहीन अवस्थामा रहनु दुःखद भएको भन्दै सुदन गुरुङले यसलाई अस्पताल वा कलेजमा रूपान्तरण गर्नुपर्ने सुझाव दिएका छन्।
योजना बिना बनेको संरचना योजना बिना नै थन्किएको उदाहरणका रूपमा दमक भ्यु टावर उभिएको उनको टिप्पणी छ। जनताको जीवनसँग जोडिने अस्पताल, कलेज वा अन्य सार्वजनिक संस्थानका रूपमा विकास गर्न सके यो संरचना बोझ नभई अवसर बन्न सक्ने उनले बताए। उनले सम्बन्धित निकायलाई अब ढिलाइ नगरी स्पष्ट निर्णय लिन र ठूलो लगानीको जनमुखी उपयोग गर्न आग्रह गरेका छन्।
उनले दमक भ्यु टावर अग्लो र भौतिक रूपमा तयार भए पनि उद्देश्यविहीन बनेको उल्लेख गर्दै निर्माण सकिएपछि पनि स्पष्ट योजना तय नगर्नु मुख्य समस्या भएको बताए। “समस्या पैसाको थिएन,” गुरुङको भनाइ छ, “समस्या सोच र जवाफदेहिताको थियो।”
