काठमाडौं । नेपाल चलचित्र पत्रकार संघका निवर्तमान अध्यक्ष दिनेश सिटौलाको स्वास्थ्य अवस्था अत्यन्तै गम्भीर रहेको छ। मस्तिष्क पक्षघात (Brain Hemorrhage) भएपछि उनलाई हाल काठमाडौँको धापासीस्थित ग्राण्डी इन्टरनेशनल अस्पतालको भेन्टिलेटरमा राखेर उपचार भइरहेको छ।
रास्वपा वरिष्ठ नेता बालेन्द्र शाह (बालेन) को चुनावी प्रचारका लागि अछाम पुगेका सिटौला अचानक बेहोस भएर लडेका थिए। लड्ने क्रममा टाउकोमा गम्भीर चोट लागेका उनलाई नेपाली सेनाको हेलिकप्टरबाट तत्काल काठमाडौँ ल्याइएको थियो।
अस्पताल स्रोतका अनुसार सिटौलालाई ‘सबाराक्नोइड हेमरेज’ भएको छ। उपचारमा संलग्न चिकित्सकले दिएको जानकारी अनुसार अस्पताल ल्याउनुअघि करिब ४५ मिनेटसम्म उनको मुटुको धड्कन रोकिएको थियो।
सिपिआर मार्फत धड्कन सुचारु गरिए पनि लामो समय मस्तिष्कमा अक्सिजन पुग्न नपाएकोले अवस्था जटिल बनेको हो। अबको ४८ देखि ७२ घण्टा भित्र चेतनामा आउने सुधारले मात्र थप उपचारको दिशा तय गर्ने चिकित्सकको भनाइ छ।
किन हुन्छ मस्तिष्क रक्तश्राव? (जान्नैपर्ने कुराहरू)
मस्तिष्कका रक्तनलीहरू फुटेर रगत जम्नुलाई ब्रेन हेमरेज भनिन्छ। सिटौलाको हकमा देखिएको समस्या ‘एन्युरिज्म’ (रक्तनलीको कमजोरी) सँग सम्बन्धित छ।
मस्तिष्क रक्तश्रावका प्रमुख कारणहरू:
१. उच्च रक्तचाप: नियन्त्रण बाहिरको प्रेसरले नली फुटाउन सक्छ।
२. एन्युरिज्म: रक्तनलीको कुनै भाग कमजोर भई बेलुन जस्तै फुलिदिन्छ र अचानक फुट्छ।
३. गम्भीर चोट: टाउकोमा लाग्ने कडा चोट वा धक्का।
४. अत्यधिक तनाव र परिश्रम: अचानक रक्तचाप बढ्ने गरी गरिने शारीरिक वा मानसिक तनाव।
सतर्कता: धेरैजसो मानिसमा जन्मजात वा पछिल्लो समय विकसित भएको ‘एन्युरिज्म’को बारेमा पहिले थाहा हुँदैन। यो अचानक फुट्ने भएकोले नियमित स्वास्थ्य जाँच र रक्तचापको नियन्त्रण नै यसबाट बच्ने उपाय हो।
