काठमाडौं, माघ २० । नेपाल आयल निगमले बजारमा खाना पकाउने ग्यासको अभाव नभएको भन्दै उपभोक्तालाई आश्वस्त पारेको छ। सोमबार एक विज्ञप्ति जारी गर्दै निगमले मागअनुसारको आपूर्ति व्यवस्था मिलाइएको जनाएको छ।
निगमका अनुसार जनवरीमा मात्रै भारतबाट ४७,३०४ मेट्रिक टन ग्यास भित्रिएको छ, जुन हिउँदको माग धान्न पर्याप्त हो। केही उद्योगमा देखिएका सामान्य समस्या सुल्झाउन र बजारमा नियमित सिलिन्डर पठाउन निर्देशन दिइसकिएको प्रवक्ता मनोजकुमार ठाकुरले बताए।
आगामी फागुन २१ को निर्वाचनलाई मध्यनजर गर्दै निगमले थप २,००० मेट्रिक टन ग्यासको कोटा बढाएको छ। ग्यासको कृत्रिम अभाव हुन नदिन निगमले उपभोक्तालाई अनावश्यक सञ्चय नगर्न र आवश्यकता अनुसार मात्र खरिद गर्न आग्रह गरेको छ।
निगमले आम उपभोक्तालाई हल्लाको पछि नलाग्न र ग्यासको अभाव हुने डरले अनावश्यक रूपमा घरमा सिलिन्डर सञ्चय नगर्न विशेष अनुरोध गरेको छ। आवश्यकताभन्दा बढी ग्यास भण्डारण गर्दा कृत्रिम अभाव सिर्जना हुने र सुरक्षाको जोखिम समेत बढ्ने भन्दै निगमले केवल आवश्यक परेको बेला मात्रै सिलिन्डर खरिद गर्न आग्रह गरेको छ।
लाइनमा बसेका उपभोक्ताको गुनासो
निगमको दाबीका बाबजुद बालाजु औद्योगिक क्षेत्रमा रहेको नेपाल ग्यासको डिपोमा देखिएको दृश्य भने फरक छ। ग्यास डिपोहरूमा “ग्यास छैन” भन्ने सूचना टाँसिएपछि उपभोक्ताहरू सोझै उद्योगसम्म पुगेका हुन्। लाइनमा बसेका एक उपभोक्ताले भने, “डिपोमा ग्यास आउँदैन, सरकार भने अभाव छैन भन्छ। हामीलाई तथ्याङ्क होइन, भान्छा बाल्न ग्यास चाहिएको हो।”
