काठमाडौँ । ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’का संयोजक दुर्गा प्रसाईंलाई जिल्ला प्रशासन कार्यालय काठमाडौँले चार दिन हिरासतमा राख्न अनुमति दिएको छ। काठमाडौँका प्रमुख जिल्ला अधिकारी ईश्वरराज पौडेलले प्रसाईंलाई हिरासतमा राखेर अनुसन्धान गर्न प्रहरीलाई म्याद दिएका हुन्।

Advertisement

जिल्ला प्रहरी परिसर काठमाडौँले उनीविरुद्ध सार्वजनिक शान्ति विरुद्धको कसुर र अफवाह फैलाएको आरोपमा अनुसन्धान अघि बढाएको छ। प्रसाईंलाई सोमबार साँझ भक्तपुरस्थित उनकै निवासबाट प्रहरीले पक्राउ गरेको थियो।

सरकारसँगको सम्झौता पूरा नभए अनिश्चितकालीन बन्द गराउने र आगामी चुनाव हुन नदिने जस्ता उत्तेजक अभिव्यक्ति दिएको आरोप उनीमाथि छ। यसअघि पनि प्रसाईं विभिन्न विवाद र कसुरमा पटक-पटक पक्राउ पर्दै र छुट्दै आएका छन्।