काठमाडौं, फागुन ६ । नेपाली कांग्रेसले आगामी प्रतिनिधि सभा निर्वाचनका लागि जनकपुरधामबाट आफ्नो चुनावी सङ्कल्प ‘प्रतिज्ञापत्र’ सार्वजनिक गरेको छ।
सभापति गगनकुमार थापा र उपसेनापति विश्वप्रकाश शर्मासहितका शीर्ष नेताहरूले सार्वजनिक गरेको यस दस्तावेजलाई कांग्रेसले ‘भिजन १०’ र ‘कांग्रेस २.०’ को जगका रूपमा व्याख्या गरेको छ। विगतको समीक्षा गर्दै पार्टी पुनरुत्थानको बाटोमा लागेको दाबीसहित कांग्रेसले जनताको सुन्दर भविष्य साकार पार्ने संकल्प लिएको छ।
यस ‘भिजन टेन’ मार्फत कांग्रेसले मर्यादित जीवन, रोजगारी सिर्जना, निःशुल्क शिक्षा र स्वास्थ्य, तथा बेथितिमुक्त विधिको शासनलाई मुख्य प्राथमिकतामा राखेको छ। अमूर्त आश्वासनभन्दा पनि कार्यान्वयन गर्न सकिने ठोस योजनासहित आएको भन्दै कांग्रेसले यसपटक आफ्ना उम्मेदवारहरूको मूल्याङ्कन यही प्रतिज्ञापत्रका आधारमा गर्न मतदातालाई अपिल गरेको छ।
प्रतिज्ञापत्र केवल देखाउन मात्रै नभई कार्यान्वयन गरेर समुन्नत नेपाल सम्मानित नेपालीको नारालाई व्यवहारमा ल्याउने प्रतिबद्धता कांग्रेसको छ ।प्रवक्ता देवराज चालिसेका अनुसार यसपटक कांग्रेसले आफ्नो कार्यसम्पादनको मूल्याङ्कन यही प्रतिज्ञापत्रका आधारमा गर्न जनतालाई आह्वान गरेको छ।
कांग्रेसका ‘भिजन १०’ का मुख्य बुँदाहरू:
१. सम्मानित भएर बाँच्न पाउने नेपाल २. सपना देख्न सक्ने नेपाल ३. सम्पत्ति र रोजगारी सिर्जनालाई प्रोत्साहन गर्ने नेपाल ४. किसानलाई प्राथमिकता दिने र खाद्य सुरक्षा सुनिश्चित गर्ने नेपाल ५. स्वास्थ्य उपचार र आवासको ग्यारेन्टी भएको नेपाल ६. शिक्षामा आर्थिक भार नपर्ने नेपाल ७. बेथितिमुक्त र विधिको शासन भएको नेपाल ८. मौलिकतामा गर्व गर्ने आधुनिक नेपाल ९. विश्वले सम्मान गर्ने स्वाभिमानी नेपाल १०. द्रुत आर्थिक समुन्नतिमा लम्किने नेपाल
