काठमाडौं, वैशाख ९ । गृहमन्त्री सुदन गुरुङले नैतिकताको आधारमा आफ्नो पदबाट राजीनामा दिएका छन्। सेयर कारोबार र सम्पत्ति आर्जनका विषयमा नागरिक स्तरबाट उठेका गम्भीर प्रश्न र चौतर्फी आलोचनापछि सुदन गुरुङले राजीनामा दिएका हुन्।
२०८२ चैत १३ गतेदेखि गृह प्रशासनको नेतृत्व सम्हालेका गुरुङले सुशासन र पारदर्शिताको माग गर्दै उठिरहेको आन्दोलनको भावनालाई कदर गर्दै सार्वजनिक जीवन स्वच्छ र नेतृत्व उत्तरदायी हुनुपर्ने मान्यताका साथ पद त्याग गरेको घोषणा गरेका हुन्। राजीनामा पत्रमा उनले ४६ जना युवाहरूको रगत र बलिदानीको जगमा बनेको सरकारमाथि प्रश्न उठ्दा त्यसको जवाफ ‘नैतिकता’ नै हुनुपर्ने उल्लेख गर्दै आफू विरुद्धका आरोपहरूमा निष्पक्ष छानबिन होस् र पदमा बहाल रहँदा ‘स्वार्थको द्वन्द्व’ सिर्जना नहोस् भन्नका लागि यो कदम चालेको स्पष्ट पारेका छन्।
आफ्नो देश, सुरक्षा निकायको सम्मान र नेपालका युवाहरूका लागि यो निर्णय लिएको बताउँदै उनले सञ्चारकर्मीहरूलाई पनि आत्मशुद्धिको बाटोमा उभिन र ‘रामराज्य’ को चाहना राख्नेले त्याग गर्ने साहस देखाउनुपर्ने चुनौती दिएका छन्, जसले राजनीतिक र सञ्चार वृत्तमा नयाँ बहस सिर्जना गरेको छ।
