चितवन, वैशाख ९ । अटोमोबाइल व्यवसायको प्रवद्र्धन र नयाँ प्रविधिको प्रदर्शनी गर्ने उद्देश्यका साथ आगामी वैशाख १७ देखि २१ गतेसम्म चितवन प्रदर्शनी केन्द्रमा ‘चितवन अटो शो २०२६’ आयोजना हुने भएको छ।
चितवन अटोमोबाइल डिलर्स एशोसिएसन र चितवन अटोमोवाईल एशोसिएसनको संयुक्त आयोजनामा हुन लागेको यो मेलाको दोस्रो संस्करण हो। यस कार्यक्रमलाई भरतपुर महानगरपालिका, चितवन उद्योग संघ र चितवन उद्योग वाणिज्य संघले सहकार्य गरेका छन्।
भरतपुरमा आयोजित पत्रकार सम्मेलनमा चितवन उद्योग संघका अध्यक्ष मदन घिमिरेले यस्ता प्रदर्शनीले जिल्लाको आर्थिक विकासमा ठूलो टेवा पुग्ने बताउनुभयो। त्यस्तै, चितवन उद्योग वाणिज्य संघका अध्यक्ष चिरञ्जीवी सुवेदीले उपभोक्ताले एउटै थलोबाट विभिन्न ब्राण्डका सवारी रोज्न पाउने हुँदा यसले बजारलाई सहज बनाउने उल्लेख गर्नुभयो।
अटोमोबाईल डिलर्स एशोसिएसनका अध्यक्ष इन्द्र प्रसाद रेग्मीका अनुसार विशेष गरी विद्युतीय सवारी (ईभी) र नवीन प्रविधिबारे उपभोक्तालाई सूचित र आकर्षित गर्न अटो शो को मुख्य भूमिका रहनेछ।
मेलाका मुख्य आकर्षणहरू:
७५ वटा स्टल – कार, जिप, मोटरसाइकल र स्कुटरका विभिन्न ब्राण्डका ७५ स्टलहरू रहनेछन्।
अन द स्पोर्ट सुविधा – बैंक तथा इन्स्योरेन्स कम्पनीहरूको सहभागिता रहने हुनाले ग्राहकले तत्कालै फाइनान्स र बीमा सुविधा प्राप्त गर्न सक्नेछन्।
भिजिटर अफर – अवलोकनकर्तामध्ये ३ जनालाई ‘लक्की ड्र’ मार्फत आकर्षक उपहार र सामाजिक सञ्जाल (फेसबुक, टिकटक) मा भाइरल हुने सामग्री बनाउनेलाई विशेष पुरस्कारको व्यवस्था गरिएको छ।
साहसिक र रोचक कार्यक्रम – भेन्टेज (पुराना) सवारी साधनको प्रदर्शनी, महँगा बिग बाइक, मोटरसाइकल स्टन्ट, र जिमहाना जस्ता कार्यक्रम आयोजना गरिनेछन्।
अटो शो का संयोजक राजन पियाले जानकारी दिएअनुसार प्रदर्शनीको तेस्रो दिन विज्ञहरूबाट ‘अटो सेमिनार’ र चौथो दिन विद्यार्थीहरूका लागि ‘हेल्मेट प्रयोग सचेतना’ तथा अन्तर्राष्ट्रियस्तरको हेल्मेट वितरण गरिनेछ। मेलाको उद्घाटनको दिन नासा बागमती प्रदेशको सहकार्यमा सवारी साधनको र्याली हुनेछ।
महिन्द्रा मुख्य प्रायोजक र एमजि सह-प्रायोजक रहेको यस मेलालाई करिब १० हजार जनाले अवलोकन गर्ने र ५० करोड रुपैयाँ बराबरको आर्थिक कारोबार हुने लक्ष्य राखिएको छ। मेलाको हरेक दिन स्थानीय कलाकारहरूद्वारा सांस्कृतिक प्रस्तुति समेत रहने आयोजकले जनाएको छ।
