काठमाडौं, वैशाख २२ । स्मार्ट टेलिकमका तत्कालीन अध्यक्ष सर्वेश जोशीलाई नेपाल प्रहरीले पक्राउ गरेको छ। केन्द्रीय अनुसन्धान ब्युरो (सीआईबी) का अनुसार उनलाई सोमबार काठमाडौं महानगरपालिका–२, खुर्सानीटारबाट नियन्त्रणमा लिइएको हो।
जोशीमाथि ठगी तथा आपराधिक विश्वासघातसम्बन्धी कसुरमा अनुसन्धान भइरहेको सीआईबीले जनाएको छ। आरोप अनुसार उनले सरकारी सम्पत्तिमा हानी पुर्याउने उद्देश्यले बेइमानीपूर्वक कार्य गरेका छन्।
स्मार्ट टेलिकमको अनुमतिपत्र नवीकरण नभएपछि २०८० साल वैशाख ३ गतेदेखि स्वतः खारेज भएको थियो। त्यसपछि कम्पनीका सम्पत्ति नेपाल दूरसञ्चार प्राधिकरणको नियन्त्रणमा गएका थिए।
तर, ती सम्पत्तिको व्यवस्थापनमा अनियमितता भएको भन्दै अनुसन्धान अघि बढाइएको हो। प्रारम्भिक अनुसन्धानमा अनुमतिपत्र खारेज भइसकेपछि स्वतः सरकारको स्वामित्वमा जानुपर्ने सम्पत्ति जोशीले एनसेललाई बिक्री गरेको पाइएको छ।
सरकारको हक टुटाउने उद्देश्यले गरिएको उक्त कार्यलाई ठगी तथा आपराधिक विश्वासघातको रूपमा लिँदै उनलाई पक्राउ गरिएको सीआईबीले स्पष्ट पारेको छ।
