हेटौंडा, वैशाख २२ । स्वास्थ्य क्षेत्रमा प्रतिष्ठित चितवन मेडिकल कलेज (सीएमसी) ले मकवानपुरको हेटौंडामा आफ्नो सेवा विस्तार गर्दै करिब २ अर्ब रुपैयाँको लगानीमा अत्याधुनिक अस्पताल निर्माण सुरु गरेको छ।
हेटौंडा उपमहानगरपालिका–४ स्थित हुप्राचौरमा १९ कठ्ठा क्षेत्रफलमा फैलिने ‘सीएमसी हेटौंडा’ नामक यस अस्पताल भवनको मंगलबार अध्यक्ष तथा प्रबन्ध निर्देशक डा. प्रताप देवकोटाले औपचारिक शिलान्यास गर्नुभयो। सुरुमा १०० शय्याको क्षमता रहने यस अस्पताललाई एक वर्षभित्रै सञ्चालनमा ल्याउने लक्ष्य राखिएको छ।
अस्पतालमा सिटी स्क्यान, क्याथ ल्याब, सघन उपचार कक्ष र अत्याधुनिक मोडुलर अपरेशन थिएटरसहितका सुपरस्पेसलिष्ट सेवाहरू उपलब्ध हुनेछन्। बागमती प्रदेशको राजधानी हेटौंडामा बन्ने यस अस्पतालले मकवानपुरसहित छिमेकी जिल्लाहरू बारा, पर्सा, रौतहट र सर्लाहीका बिरामीलाई उपचारका लागि काठमाडौं वा चितवन धाउनुपर्ने बाध्यताको अन्त्य गर्ने विश्वास गरिएको छ।
अध्यक्ष देवकोटाका अनुसार यो परियोजना स्वास्थ्य सेवाको विकेन्द्रीकरण गर्ने रणनीतिको एक हिस्सा हो। अस्पताल पूर्ण रूपमा सञ्चालनमा आउँदा ५० चिकित्सकसहित करिब ५ सय जनाले प्रत्यक्ष रोजगारीको अवसर पाउनेछन्, जसले स्थानीय स्तरमा स्वास्थ्य सेवा सुदृढ गर्नुका साथै हेटौंडाको आर्थिक गतिविधिमा समेत ठूलो टेवा पुर्याउने अपेक्षा गरिएको छ।
