काठमाडौं, वैशाख २५ । उत्कृष्ट समीक्षा र दर्शकको व्यग्र प्रतीक्षाका बीच नेपाली चलचित्र ‘मालती मंगले’ आज (शुक्रबार) देखि देशभरका सिनेमा घरहरूमा प्रदर्शनमा आएको छ। वितरक रोहित कट्टेलका अनुसार चलचित्रले देशभर १५० भन्दा बढी शो प्राप्त गर्दै सानदार सुरुवात गरेको छ।

रिलिजको पूर्वसन्ध्यामा आयोजित ग्रान्ड प्रिमियरमा रास्वपा सभापति रवि लामिछाने लगायतका विशिष्ट व्यक्तित्वहरूले चलचित्रको खुलेर प्रशंसा गरेका थिए। सभापति लामिछानेले यसलाई ‘नेपाली समाजले भन्नै पर्ने कथा’ को संज्ञा दिएका छन्।

प्रकु पाण्डेयको निर्देशन र रामकृष्ण ढकालको निर्माणमा बनेको यस सोसल-ड्रामामा विजय बरालको स्वभाविक अभिनय र वर्षा राउतको करियरकै उत्कृष्ट प्रस्तुति रहेको समीक्षकहरूको दाबी छ। कलाकार मेक्सम गौडेलको ठूलो पर्दाको उपस्थितिलाई पनि चलचित्रको मुख्य आकर्षण मानिएको छ। रानी फिल्म्स र युनि इन्टरटेन्मेन्टको ब्यानरमा निर्मित यस चलचित्रले बक्स अफिसमा बलियो नतिजा निकाल्ने अपेक्षा गरिएको छ।