ललितपुर, वैशाख २७ । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीभित्र कुनै पनि प्रकारको गुटबन्दी नगर्न सांसदहरूलाई निर्देशन दिनुभएको छ। ललितपुरमा आयोजित सांसदहरूका लागि दुई दिने प्रशिक्षण कार्यक्रमलाई सम्बोधन गर्दै लामिछानेले पार्टीभित्र ‘रवि समूह’ वा ‘बालेन समूह’ भन्ने चर्चा निराधार रहेको स्पष्ट पार्नुभयो।
सभापति लामिछानेले पार्टीमा आन्तरिक समूहका लागि कुनै स्थान नभएको भन्दै सबैलाई एकताबद्ध भएर अघि बढ्न आग्रह गर्नुभयो। विगतमा नेताहरू एकजुट हुन नसक्दा देश पछि परेको स्मरण गराउँदै उहाँले रास्वपाका नेताहरू राजनीतिमा नयाँ भए पनि वैचारिक रूपमा परिपक्व रहेको दाबी गर्नुभयो।
सम्बोधनका क्रममा उहाँले सुकुम्बासी व्यवस्थापनको विषयमा पनि चर्चा गर्नुभयो। सरकारले सुकुम्बासी समस्या समाधानका लागि काम गरिरहेको र कोही पनि घरबारविहीन नहुने गरी व्यवस्थापन गरिनेमा उहाँले आश्वस्त पार्नुभयो।
