काठमाडौं, वैशाख ३० । प्रधानमन्त्री बालेन शाहले संघीय संसद्मा सरकारको नीति तथा कार्यक्रममाथि सांसदहरूले उठाएका प्रश्नको जवाफ नदिने भएका छन्। प्रचलित संसदीय परम्परा अनुसार सामान्यतया प्रधानमन्त्री आफैँले जवाफ दिनुपर्ने भए तापनि, यस पटक उनको सट्टामा अर्थमन्त्री स्वर्णिम वाग्लेले उत्तर दिने तयारी भएको छ।
आज बिहान ११ बजे बस्ने प्रतिनिधि सभाको बैठकमा आर्थिक वर्ष २०८३/८४ को नीति तथा कार्यक्रममाथि दफावार छलफल जारी रहनेछ। छलफल सकिएलगत्तै आजै यसलाई निर्णयार्थ प्रस्तुत गरिने सम्भावना छ। यसअघि मंगलबार विभिन्न दलका सांसदहरूले नीति तथा कार्यक्रमको पक्ष र विपक्षमा आ-आफ्नो धारणा राखिसकेका छन्।
राष्ट्रपति रामचन्द्र पौडेलले सोमबार प्रस्तुत गरेको यसै नीति तथा कार्यक्रमको मार्गदर्शनमा रहेर सरकारले आगामी आर्थिक वर्षको बजेट सार्वजनिक गर्ने तयारी गरेको छ। यसैगरी, राष्ट्रिय सभाको बैठक पनि आजै दिउँसो १२:१५ बजे बस्दैछ, जहाँ नीति तथा कार्यक्रममाथि प्रारम्भिक छलफल सुरु हुने कार्यसूची रहेको छ।
