काठमाडौं, साउन ३ । सामाजिक सञ्जाल फेसबुकको वेब भर्सन (कम्प्युटर वा ल्यापटपमा ब्राउजरमार्फत खोलिने फेसबुक) मा प्राविधिक समस्या देखिएको छ। विगत करिब दुई घण्टादेखि विश्वभरका लाखौँ प्रयोगकर्ताहरूले फेसबुक लगइन गर्न र चलाउन पाइरहेका छैनन्।

ब्राउजरमा फेसबुक खोल्दा “Account Temporarily Unavailable” (खाता अस्थायी रूपमा उपलब्ध छैन) भन्ने सन्देश देखिने गरेको छ। स्क्रिनमा देखिने उक्त सन्देशमा लेखिएको छ, “वेबसाइटमा आएको समस्याका कारण तपाईंको खाता हाल उपलब्ध छैन। हामी यो समस्या चाँडै समाधान हुने अपेक्षा गर्दछौँ। कृपया केही मिनेटपछि पुनः प्रयास गर्नुहोला।”

वेबसाइटहरूको गढबढी ट्र्याक गर्ने अन्तर्राष्ट्रिय अनलाइन पोर्टल ‘डाउन डिटेक्टर’का अनुसार फेसबुकमा यो समस्या आज दिउँसो १:३० बजेदेखि सुरु भएको हो। समस्या सुरु भएलगत्तै हजारौँ प्रयोगकर्ताहरूले फेसबुक डाउन भएको भन्दै रिपोर्ट गरिरहेका छन्।

फेसबुकको मातृ कम्पनी ‘मेटा’ ले यसबारे अहिलेसम्म कुनै आधिकारिक धारणा सार्वजनिक गरिसकेको छैन। मोबाइल एपमा भने कतिपय प्रयोगकर्ताको फेसबुक चलिरहेको भए पनि वेब भर्सन पूर्ण रूपमा प्रभावित भएको छ।