काठमाडौं, साउन ४ । हप्तामा दुई दिन (शनिबार र आइतबार) बिदा दिने नीतिको कार्यान्वयनपछि विद्यमान सार्वजनिक बिदा व्यवस्थापनको मूल्याङ्कन गर्न सरकारले एक कार्यदल गठन गरेको छ।
सचिव बैठकको निर्णयअनुसार गृह मन्त्रालयका सहसचिवको संयोजकत्वमा गठित उक्त कार्यदलमा प्रधानमन्त्री तथा मन्त्रिपरिषद्को कार्यालय, भूमि व्यवस्था, सङ्घीय मामिला तथा सामान्य प्रशासन र अर्थ मन्त्रालयका प्रतिनिधिहरू सदस्य रहेका छन्।
कार्यदललाई १५ दिनभित्र अध्ययन प्रतिवेदन गृह मन्त्रालयमा बुझाउन निर्देशन दिइएको छ। समितिले सार्वजनिक बिदाको प्रभाव, आवश्यकता र व्यवस्थापनका पक्षहरूको अध्ययन गरी सरकारलाई नीतिगत सुझाव पेस गर्नेछ।
साथै, चालु आर्थिक वर्षका लागि तय गरिएका विधेयकहरूको मस्यौदा छिटो तयार गर्न र पुराना, असान्दर्भिक तथा कार्यसम्पादनमा बाधा पुर्याउने कानुनहरू खारेज गर्ने प्रक्रिया अघि बढाउन सम्बन्धित मन्त्रालयहरूलाई निर्देशन दिइएको छ।
