काठमाडौं, साउन ६ । जल तथा मौसम विज्ञान विभाग अन्तर्गतको बाढी पूर्वानुमान महाशाखाले आगामी तीन दिनसम्म देशका प्रमुख नदीहरूमा बहाव उल्लेख्य बढ्ने पूर्वानुमान गरेको छ। विभागले कोशी, नारायणी, कर्णाली, महाकाली तथा तिनका सहायक नदीहरूमा बहाव बढ्ने जनाएको हो।
कोशी जलाधार अन्तर्गत सुनकोशी, तमोर, अरुण, दूधकोशी, तामाकोशी र इन्द्रावती नदीमा बहाव बढ्ने अनुमान गरिएको छ। त्यस्तै नारायणी जलाधारका त्रिशूली, बुढीगण्डकी, मर्स्याङ्दी, सेती र कालीगण्डकी नदीमा पनि पानीको मात्रा उल्लेख्य बढ्न सक्ने विभागले जनाएको छ।
कर्णाली नदीका विभिन्न मापन केन्द्रहरूमा बहाव वृद्धि हुने पूर्वानुमान गरिएको छ। महाकाली, कन्काई, कमला, बागमती, पूर्वी राप्ती, पश्चिम राप्ती तथा बबई नदीमा पनि आगामी तीन दिनसम्म बहाव बढ्ने सम्भावना रहेको महाशाखाको भनाइ छ।
साना नदीमा आकस्मिक बाढीको जोखिम
विभागका अनुसार आज तेह्रथुम, संखुवासभा, रामेछाप, दोलखा, काभ्रेपलाञ्चोक, काठमाडौँ, भक्तपुर, ललितपुर, कास्की, तनहुँ, स्याङ्जा, पर्वत, बागलुङ, बाजुरा, डोटी, डडेलधुरा, बैतडी, दार्चुला लगायतका जिल्लामा बहने साना नदी तथा खोल्सामा आकस्मिक बाढीको मध्यम जोखिम रहेको छ।
भोलि कोशी, बागमती र गण्डकी प्रदेशका केही साना नदीमा तथा पर्सि कोशी, बागमती, गण्डकी, लुम्बिनी र सुदूरपश्चिम प्रदेशका केही नदीमा आकस्मिक बहाव बढ्न सक्ने चेतावनी दिइएको छ।
बाढी पूर्वानुमान महाशाखाले नदी किनार, तटीय क्षेत्र र पहिरो जोखिमयुक्त स्थानमा बसोबास गर्ने नागरिकलाई सतर्क रहन आग्रह गरेको छ। विशेषगरी वर्षा भइरहेका बेला नदी तथा खोल्सा तर्ने काम नगर्न र स्थानीय प्रशासनले जारी गर्ने सूचनाको पालना गर्न अनुरोध गरिएको छ।
