काठमाडौं, साउन ७ । प्रधानमन्त्री वालेन्द्र शाहले आज अर्ग्यानिक कृषि उत्पादन, प्रशोधन तथा बजारीकरणका विषयमा सम्बद्ध व्यवसायीहरूसँग छलफल गर्दै हुनुहुन्छ।
प्रधानमन्त्री तथा मन्त्रिपरिषद्को कार्यालयमा बिहान ११:३० बजे आयोजना गरिएको उक्त बैठकमा नेपाल अर्ग्यानिक सङ्घका पदाधिकारी तथा व्यवसायीहरूको सहभागिता रहनेछ। छलफलमा मुख्य गरी नेपालमा अर्ग्यानिक कृषि उत्पादनको वृद्धि, प्रशोधन प्रणाली, आन्तरिक तथा बाह्य व्यापार, बजारीकरण र निर्यात प्रवर्द्धनका सम्भावना तथा चुनौतीबारे संवाद हुने जनाइएको छ।
उक्त बैठकमा नेपाल अर्ग्यानिक सङ्घका अध्यक्ष दीपक बास्कोटा, उपाध्यक्ष प्रेम लामा, गोर्खा टी इस्टेटका अध्यक्ष उदय चापागाईं, हिमालयन साङ्ग्रिला टी फ्याक्ट्रीका अध्यक्ष कमल मैनाली तथा अन्नपूर्ण अग्र्यानिक एग्रो इन्डस्ट्रिका अध्यक्ष पर्शुराम आचार्य सहभागी हुने कार्यक्रम रहेको छ।
नेपाल अर्ग्यानिक सङ्घ नेपालमा जैविक (अर्ग्यानिक) कृषि उत्पादन, प्रशोधन, व्यापार र उपभोगको प्रवर्द्धनमा क्रियाशील संस्था हो। प्रधानमन्त्री शाहले देशभित्र उद्योग तथा व्यवसाय प्रवर्द्धनका लागि सरोकारवाला उद्योगी-व्यवसायीहरूसँग निरन्तर छलफल गर्दै उनीहरूका जायज मागहरू सम्बोधन गर्दै आउनुभएको छ।
