काठमाडौं, साउन ७ । धर्म र परम्पराका नाममा चल्ने विकृति तथा कथित ‘माता’हरूको भण्डाफोर गरेर सामाजिक सञ्जालमा चर्चामा आएकी अभियन्ता वेदिका केसीलाई प्रहरीले नियन्त्रणमा लिएको छ।

कथा वाचिका राधिका दासीविरुद्ध सामाजिक सञ्जालमार्फत भ्रामक प्रचार र अफवाह फैलाएको आरोपमा नेपाल प्रहरीको केन्द्रीय साइबर ब्युरोले उनलाई काठमाडौँको जोरपाटीबाट पक्राउ गरेको हो। ब्युरोका अनुसार उनीमाथि विद्युतीय अपराध (साइबर कसुर) अन्तर्गत मुद्दा दर्ता गरी अनुसन्धान अघि बढाउन काठमाडौँ जिल्ला अदालतबाट एक दिनको म्याद थप गरिएको छ।

पछिल्लो समय सामाजिक सञ्जाललाई माध्यम बनाएर धर्म, आस्था र अन्धविश्वासमाथि बहस छेड्दै आएकी केसीले आफूलाई ‘धार्मिक सुधारक’का रूपमा प्रस्तुत गर्दै आएकी थिइन्। आफ्नो यही भण्डाफोर अभियानका क्रममा कथा वाचिका राधिका दासीसँग जोडिएका विषयमा सार्वजनिक टिप्पणी गरेपछि विवाद बढेको थियो। सोही विषयलाई लिएर परेको उजुरीका आधारमा साइबर ब्युरोले उनलाई नियन्त्रणमा लिएको हो। प्रहरीले घटनाबारे थप तथ्य संकलन र अनुसन्धान भइरहेको जनाएको छ।