काठमाडौं, साउन ११ । हाल देशभर मनसुनी वायुको प्रभाव कायम रहेको छ। मनसुनको न्यून चापीय रेखा औसत स्थानको आसपास रहेकाले देशका विभिन्न क्षेत्रमा वर्षा हुने अनुकूल अवस्था बनेको छ।
आज दिउँसो देशभर मनसुनी प्रणाली सक्रिय रहनेछ। हिमाली र पहाडी भू-भागमा सामान्यदेखि पूर्ण बदली रहनेछ भने बागमती, गण्डकी, लुम्बिनी र सुदूरपश्चिमका तराई क्षेत्रमा पनि बादल लाग्ने सम्भावना छ। कोशी र मधेश प्रदेशका तराई क्षेत्रमा भने आंशिक बदली रहनेछ।
हिमाली क्षेत्रका केही स्थान तथा पहाडी क्षेत्रका धेरै स्थानमा मेघगर्जन/चट्याङसहित मध्यम वर्षा हुने सम्भावना छ। लुम्बिनी र सुदूरपश्चिमका तराईका धेरै स्थान, बागमती र गण्डकीका केही स्थान तथा कोशी र मधेशका थोरै स्थानमा पनि मेघगर्जन/चट्याङसहित वर्षा हुन सक्छ।
गण्डकी र कर्णालीका पहाडी क्षेत्रका एक-दुई स्थान तथा लुम्बिनी र सुदूरपश्चिमका पहाडी र तराई क्षेत्रका केही स्थानमा भारी वर्षाको सम्भावना रहेको छ।
आज राति देशभर सामान्यदेखि पूर्ण बदली रहनेछ। हिमाली र पहाडी भू-भागका केही स्थानमा मेघगर्जन/चट्याङसहित मध्यम वर्षा वा हिमपात हुन सक्छ। साथै मधेश तथा कोशी, बागमती, गण्डकी, लुम्बिनी र सुदूरपश्चिमका तराई क्षेत्रका केही स्थानमा पनि वर्षाको सम्भावना रहेको छ।
बागमती, गण्डकी र सुदूरपश्चिमका पहाडी क्षेत्र तथा लुम्बिनी र सुदूरपश्चिमका तराईका एक-दुई स्थानमा भारी वर्षा हुन सक्ने भएकाले आवश्यक सतर्कता अपनाउन अनुरोध गरिएको छ।
