काठमाडौं, साउन १५ । पाकिस्तानीस्थित विश्वको १२औँ सर्वोच्च हिमाल ब्रोड पिकमा गएको हिमपहिरोमा परेर बेपत्ता भएका १० जना आरोहीमध्ये चारजनाको शव फेला परेको छ भने बाँकी ६ जनाको खोजी कार्य तीव्र पारिएको छ।
अत्यन्त प्रतिकूल मौसमका बाबजुद उद्धार टोलीले शवहरू बाहिर निकाल्ने र बेपत्ताहरूको खोजी गर्ने हरसम्भव प्रयास गरिरहेको छ। हेलिकप्टर सहायतासहित उपलब्ध सबै उद्धार स्रोतसाधन परिचालन गरिएको पाकिस्तानी सरकारले जनाएको छ। यद्यपि, फेला परेका शवहरूको औपचारिक पहिचान खुलिसकेको छैन।
पाकिस्तानको काराकोरम पर्वत शृङ्खलास्थित ८,०४७ मिटर अग्लो ब्रोड पिक हिमालमा आरोहणका क्रममा विश्वचर्चित नेपाली पर्वतारोही निर्मल पुर्जा (निम्स दाइ) को नेतृत्वमा रहेको १० सदस्यीय अन्तर्राष्ट्रिय आरोही दल बिहीबार मध्याह्नतिर आएको हिमपहिरोपछि आधार शिविरसँग पूर्ण रूपमा सम्पर्कविहीन बनेको थियो। सेनाको हेलिकप्टर तथा स्थलगत उद्धार टोली परिचालन गरिए पनि प्रतिकूल मौसमका कारण उद्धार कार्यमा केही बाधा पुगेको छ।
अल्पाइन क्लब अफ पाकिस्तानका अनुसार उक्त टोलीमा नेपाल, पाकिस्तान, अमेरिका, चीन र ओमानका नागरिक सहभागी थिए। टोलीमा ६ जना नेपाली—निर्मल पुर्जा, पुरबहादुर गुरुङ, किली पेम्बा शेर्पा, निमा शेर्पा, नावाङ थिन्दु शेर्पा र ग्यालु शेर्पा—सहित पाकिस्तानका सोहेल साखी, ओमानकी नाधिरा अहमद अब्दुल्लाह अल हार्थी, चीनका वाङ झोङ र अमेरिकाकी म्यालोरी गाइस रहेका थिए।
उत्तरी पाकिस्तानका हिमालहरूमा छिटो बदलिरहने मौसम र हिमपहिरोका कारण पर्वतारोहणका क्रममा यस्ता दुर्घटनाहरू बारम्बार हुने गरेका छन्। उद्धारकर्ताहरू बाँकी ६ जनाको खोजीमा निरन्तर खटिरहेका छन्।
