काठमाडौं, साउन २० । पाकिस्तानस्थित ब्रड पिक हिमालमा निधन भएका विश्वप्रसिद्ध नेपाली पर्वतारोही निर्मल ‘निम्स’ पुर्जासहित चार पर्वतारोहीको शव सफलतापूर्वक उद्धार गरी आधार शिविर (बेस क्याम्प) ल्याइएको छ।
एलिट एक्स्पिडले बुधबार जारी गरेको विज्ञप्तिअनुसार पुर्जासँगै झोङ वाङ, निमा शेर्पा र किलु शेर्पाको शव अत्यन्त कठिन र जोखिमपूर्ण उद्धार अभियानपछि आधार शिविर पुर्याइएको हो।
उद्धार अभियानको नेतृत्व मिङ्मा जीले गरेका थिए भने सिर्बाज खानसहितको टोलीले स्थलबाट उद्धार कार्य सम्पन्न गरेको विज्ञप्तिमा उल्लेख छ। अभियान सफल बनाउन खटिएका सम्पूर्ण उद्धार टोलीप्रति एलिट एक्स्पिडले आभार व्यक्त गरेको छ।
साथै पाकिस्तान सेना, पाकिस्तान सरकार, गिलगिट–बाल्टिस्तान सरकार, स्थानीय प्रशासन, बेलायती उच्चायोग, नेपाल दूतावास, अल्पाइन क्लब अफ पाकिस्तान तथा उद्धार अभियानमा सहयोग गर्ने सबै निकायप्रति पनि कृतज्ञता व्यक्त गरिएको छ।
एलिट एक्स्पिडले निर्मल पुर्जा केवल एक पर्वतारोही मात्र नभई श्रीमान्, पिता, छोरा, दाजुभाइ, साथी तथा संस्थाको प्रेरणाका स्रोत रहेको उल्लेख गर्दै उनको निधनले अपूरणीय क्षति पुगेको जनाएको छ।
विज्ञप्तिमा अझै बेपत्ता रहेका अन्य तीन पर्वतारोहीका परिवारप्रति पनि समवेदना व्यक्त गर्दै मौसम र सुरक्षा अवस्था अनुकूल भएपछि उनीहरूको खोज तथा उद्धारका लागि सक्दो सहयोग जारी राखिने प्रतिबद्धता जनाइएको छ।
