काठमाडौं, साउन २८ । नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवा साढे पाँच महिनाभन्दा लामो समयको परराष्ट्र बसाइपछि बिहीबार स्वदेश फर्केका छन्।
स्वास्थ्य उपचारका लागि गत फागुन १३ गते श्रीमती आरजु राणासहित सिंगापुर गएका देउवा बिहीबार दिउँसो काठमाडौं आइपुगेका हुन्। विदेशमा लामो समय बिताएर स्वदेश फर्किएका देउवालाई त्रिभुवन अन्तर्राष्ट्रिय विमानस्थलमा पार्टीका नेता-कार्यकर्ताहरूले बाजागाजा र झाँकीसहित भव्य रूपमा स्वागत गरेका छन्। देउवाले त्रिभुवन अन्तर्राष्ट्रिय विमानस्थलमा दिउँसो साढे १२ बजे अवतरण गरेका हुन्।
विमानस्थलमा उनको स्वागतका लागि पार्टीका वरिष्ठ नेता तथा कार्यकर्ताहरूको बाक्लो उपस्थिति रहेको थियो। स्वागतका लागि पुग्नेहरूमा कांग्रेसका पूर्वउपसभापति पूर्णबहादुर खडाकासहित वरिष्ठ नेताहरू प्रकाशमान सिंह, कृष्णप्रसाद सिटौला, आनन्द ढुंगाना, मोहन बस्नेत र विमलेन्द्र निधि रहेका थिए।
गत वर्षको भदाै महिनामा जेन जीको नेतृत्वमा भएको प्रदर्शनका क्रममा उनी र उनकी पत्नी डा. आरजु राणामाथि आक्रमण भएको थियो। त्यसपश्चात् उनीहरू उपचारका लागि विदेश गएका थिए। लामो समयको उपचारपछि देउवा बिहीबार नेपाल फर्किएका हुन्।
