काठमाडौं, भदौ २३ । राष्ट्रिय स्वतन्त्र पार्टी (रास्वपा) का सभापति रवि लामिछानेले जेन्जी आन्दोलनको एक वर्ष पूरा भएको अवसरमा आन्दोलनको मर्मलाई स्मरण गर्दै युवा पुस्ताको खबरदारी निरन्तर आवश्यक रहेको बताएका छन्।
एक वर्षअघि भएको युवा आन्दोलनलाई स्मरण गर्दै लामिछानेले भ्रष्टाचार, दलीय भागबन्डा, संस्थागत अक्षमता, नागरिक अधिकारमाथिको नियन्त्रण र अवसरविहीनताविरुद्ध युवा पुस्ता सडकमा उत्रिएको बताएका हुन्।
उनले आन्दोलनका क्रममा ज्यान गुमाएका नागरिक तथा कर्तव्य पालनका क्रममा मृत्यु भएका प्रहरीहरूप्रति श्रद्धाञ्जली व्यक्त गरेका छन्। साथै, आन्दोलनका क्रममा घाइते तथा अङ्गभङ्ग भएकाहरूको उचित उपचार, परिवारको हेरचाह र दीर्घकालीन पुनर्स्थापनाको जिम्मेवारी राज्यले पूरा गर्नुपर्नेमा जोड दिएका छन्।
लामिछानेले उक्त आन्दोलन कुनै राजनीतिक दलको आह्वानमा नभई स्वस्फूर्त युवा जागरणका रूपमा भएको दाबी गर्दै कुनै पनि दल वा नेताले त्यसलाई आफ्नो राजनीतिक लाभका लागि प्रयोग गर्न नहुने बताएका छन्।
उनका अनुसार आन्दोलनले परम्परागत राजनीतिक शैलीप्रति युवा पुस्ताको स्पष्ट असन्तुष्टि र अस्वीकृति प्रकट गरेको थियो। डिजिटल युगमा हुर्किएको युवा पुस्ताले आफ्नै देशमा भविष्य खोजिरहेको र कुशासन स्वीकार नगर्ने सन्देश आन्दोलनले दिएको उनको भनाइ छ।
लामिछानेले युवा, नागरिक समाज र आम नागरिकलाई सरकार तथा राजनीतिक दलहरूको निरन्तर रचनात्मक खबरदारी गर्न आग्रह गरेका छन्। तर, नागरिक आक्रोशलाई निराशामा परिणत नगरी राष्ट्र निर्माणको शक्तिमा रूपान्तरण गर्नुपर्ने उनको जोड छ।
उनले अन्त्यमा विधिको शासन, समतामूलक समृद्धि र राष्ट्रिय स्वाभिमानको बाटोबाट रास्वपा विचलित नहुने प्रतिबद्धता व्यक्त गरेका छन्।
‘जागरणको त्यो आँधीले कोरेको विधिको शासन, समतामूलक समृद्धि र राष्ट्रिय स्वाभिमानको मार्गबाट हामी एक इन्च पनि विचलित हुने छैनौँ,’ लामिछानेले भनेका छन्।
