रसुवा, भदौ २३ । बाढीपहिरो तथा अन्य विपद्बाट प्रभावित विभिन्न क्षेत्रमा नेपाली सेनाले खोज तथा उद्धार कार्यलाई तीव्रता दिएको छ। नेपाली सेनाका अनुसार आज दिउँसो ३ बजेसम्म विभिन्न प्रभावित क्षेत्रबाट थप २० जनाको हवाई उद्धार गरिएको छ।
यससँगै हालसम्म नेपाली सेनाले हवाई साधनमार्फत ४ हजार ४० जनाको उद्धार गरेको छ। उद्धार गरिएकामध्ये ३ हजार ७५७ जना नेपाली र २८३ जना विदेशी नागरिक रहेका छन्।
विशेषगरी रसुवा क्षेत्रमा जलविद्युत आयोजनाका टनेलमा फसेकाहरूको खोज तथा उद्धारलाई प्राथमिकतामा राखिएको छ। रसुवागढी जलविद्युत आयोजनाको रोङ्गास्थित केबल टनेलमा ड्रोनमार्फत खोजी गर्दा एक शव फेला परेको नेपाली सेनाले जनाएको छ। लाङटाङ जलविद्युत आयोजनामा पनि संयुक्त उद्धार टोलीले खोजी कार्य जारी राखेको छ।
चिलिमे जलविद्युत आयोजनामा विदेशीसहितको संयुक्त टोलीले टनेलभित्र पुगेर खोज तथा उद्धार गरिरहेको छ। उद्धारका लागि ठूला पाइप प्रयोग गरी हिँड्न मिल्ने बाटो निर्माण गरिएको छ भने Winch Machine र Bucket को प्रयोगबाट टनेलभित्रको debris हटाउने काम भइरहेको छ। संयुक्त टोली टनेलभित्र करिब ११५ मिटरसम्म प्रवेश गरी खोजीमा जुटेको छ।
माथिल्लो त्रिशूली–१ आयोजनाको मुख्य प्रवेश टनेलमा संयुक्त टोली करिब ४०० मिटरसम्म प्रवेश गरी खोजी गरिरहेको छ। त्रिशूली–३ ‘ए’ आयोजनाको पावरहाउस तथा टनेलमा नेपाली सेना, सशस्त्र प्रहरी बल र आयोजनाका प्रतिनिधिसहितको टोलीले खोजी जारी राखेको छ।
त्रिशूली–३ ‘बी’ आयोजनामा नेपाली सेनाका १०१ जनासहितको संयुक्त टोलीले तीनवटा Excavator प्रयोग गरी करिब २३ फिट गहिराइसम्म उत्खनन गरेर खोजी गरेको छ। कार्यालय तथा आवासगृह क्षेत्रमा खोजी गर्दा हालसम्म केही फेला नपरे पनि खोजी कार्य जारी रहेको सेनाले जनाएको छ।
यसैबीच, नुवाकोटको विदुर नगरपालिका–५, देवीघाटस्थित तादी नदीमा नेपाली सेनाको इन्जिनियरिङ फौजका ५५ जनाको टोलीले पुल निर्माण कार्य तीव्र बनाएको छ। ढुङ्गे बुद्ध मन्दिरको तल्लो भागबाट त्रिशूली बजार जोड्ने करिब २५० मिटर लामो झोलुङ्गे पुल निर्माणका लागि पनि काम सुरु गरिएको छ।
प्रभावित क्षेत्रका मैलुङदेखि स्याफ्रुबेसीसम्म नेपाली सेनाले पैदल गस्तीमार्फत खोज तथा उद्धार गरिरहेको छ। त्रिशूली र धुन्चेमा स्थापना गरिएका आपत्कालीन उपचार केन्द्र तथा मेडिकल पेट्रोलमार्फत आज मात्रै ५० जनाले स्वास्थ्य सेवा लिएका छन्।
नेपाली सेनाका अनुसार रसुवाको टिमुरेदेखि नुवाकोट, धादिङ, चितवन र नवलपरासी पूर्वसम्मका प्रभावित क्षेत्रमा ९ हजारभन्दा बढी सैनिक प्रत्यक्ष रूपमा परिचालित छन्। उनीहरूले घाइतेको खोज तथा उद्धार, शव व्यवस्थापन, राहत सामग्री ढुवानी, अवरुद्ध सडक तथा पुल सञ्चालन र आपत्कालीन उपचारलगायतका काम गरिरहेका छन्। (Source : Nepal Army)
