राजविराज, भदौ २५ । सप्तरीको राजविराजस्थित गजेन्द्रनारायण सिंह अस्पतालमा उपचारका लागि पुगेकी एक गर्भवती महिलाले अस्पतालको गेटबाहिरै बच्चा जन्माउनुपरेको घटना सार्वजनिक भएको छ।
राष्ट्रिय स्वतन्त्र पार्टीका सांसद तथा पूर्व खेलकुदमन्त्री बब्लु गुप्ताकाे फेसबुकमार्फत सार्वजनिक भएको सिसिटिभी फुटेजमा मंगलबार राति करिब २ बजेको समयमा अस्पतालको गेटनजिकै एक महिलाले अस्पतालकाे गेटबाहिर नै बच्चा जन्माएको दृश्य देखिएको छ। फुटेजमा महिला गेट परिसरमै प्रसूति पीडामा रहेको र त्यहीँ बच्चा जन्मिएको देखिन्छ।
प्राप्त विवरणअनुसार, ती महिलाले अस्पतालले मागेको रकम तिर्न नसकेपछि अस्पतालबाट बाहिरिनुपरेको आरोप लगाइएको छ। आर्थिक अभावका कारण गर्भवती महिलाले अस्पताल परिसरमै सुरक्षित प्रसूति सेवा पाउन नसकेको र अन्ततः गेटबाहिरै बच्चा जन्माउन बाध्य भएको दाबी गरिएको छ।
यदि उपचार शुल्क तिर्न नसकेकै कारण गर्भवती महिलालाई आवश्यक प्रसूति सेवा नदिइएको पुष्टि भएमा यो घटना सरकारी स्वास्थ्य संस्थाको सेवा प्रणालीमाथि गम्भीर प्रश्न उठाउने विषय बन्ने सांसद बब्लु गुप्ताले बताउनु भएकाे छ ।
“गरिब तथा विपन्न नागरिकको आशाको केन्द्र मानिएको सरकारी अस्पतालमा उपचारका लागि पुगेकी महिलाले अस्पतालकै गेटबाहिर बच्चा जन्माउनुपर्ने अवस्था आउनु अत्यन्तै दुःखद र संवेदनशील विषय हो,” भन्दै सांसद गुप्ताले घटनालाइ अत्यन्त गम्भीर रूपमा लिएकाे बताउनुभएकाे छ।
स्वास्थ्य सेवा नागरिकको आधारभूत अधिकार भएकाले आर्थिक अवस्था कमजोर भएकै कारण कुनै पनि गर्भवती महिलाले सुरक्षित प्रसूति सेवाबाट वञ्चित हुनुपर्ने अवस्था आउन नहुने सरोकारवालाहरूको भनाइ छ।
अस्पताल प्रशासनले घटनाबारे के स्पष्टीकरण दिएको छ भन्ने विषय अहिले बाहिरीएकाे छैन ।
