काठमाडौं, असोज २ । भाद्र १० गते रसुवाको भोटेकोसीमा आएको विनाशकारी बाढीपछि सम्पर्कविहीन भएका माथिल्लो त्रिशूली–१ जलविद्युत् आयोजनाका व्यक्तिहरूको खोजीका क्रममा ६ वटा शव फेला परेका छन्।
आयोजनाका प्रतिनिधिसहितको संयुक्त उद्धार टोलीले खोजी गर्ने क्रममा अडिट–३ टनेलभित्र ढलानका लागि बुनिएको डन्डीको जालीको भित्री भागमा अल्झिएको अवस्थामा ६ वटा शव फेला पारेको हो।
सुरुङभित्रबाट शव निकाल्न उद्धार टोलीले ग्राइन्डर, ग्यास कटर र रोटरी रेस्क्यु उपकरण प्रयोग गरेको जनाइएको छ। उद्धार टोलीले कठिन अवस्थामा सुरुङभित्र प्रवेश गरी शवहरू बाहिर निकालेको हो।
यसैबीच, टनेलभित्र हिलोले छोपिएको अवस्थामा थप शवजस्तो आकृति समेत देखिएको जनाइएको छ। उक्त क्षेत्रमा पनि खोजी कार्य जारी रहेको छ।
भोटेकोसीमा आएको बाढीपछि माथिल्लो त्रिशूली–१ जलविद्युत् आयोजनामा कार्यरत केही व्यक्ति सम्पर्कविहीन भएका थिए। उनीहरूको खोजीका लागि आयोजनाका प्रतिनिधि, उद्धारकर्मी तथा सम्बन्धित निकायको संयुक्त टोली परिचालन गरिएको थियो।
थप खोजी तथा उद्धार कार्य जारी रहेको जनाइएको छ।
