प्रधानमन्त्री बालेन्द्र शाहले (बालेन) ले आगामी असोज ९ गते शुक्रबारदेखि ११ गते आइतबारसम्म देशका विभिन्न स्थानमा भारीदेखि अति भारी वर्षाको सम्भावना रहेको भन्दै नागरिकलाई सतर्क रहन आग्रह गरेका छन्।
सामाजिक सञ्जालमार्फत सार्वजनिक गरेको सूचनामा शाहले मेघगर्जन, चट्याङ र हावाहुरीसहित वर्षा हुनसक्ने उल्लेख गर्दै गण्डकी र लुम्बिनी प्रदेशका केही स्थानमा भारीदेखि अति भारी वर्षाको सम्भावना रहेको बताएका छन्। यस्तै कोशी, बागमती, मधेश, कर्णाली र सुदूरपश्चिम प्रदेशका केही स्थानमा पनि भारीदेखि धेरै भारी वर्षा हुनसक्ने पूर्वानुमान रहेको उनले उल्लेख गरेका छन्।
उनले सम्भावित वर्षाका कारण बाढी, पहिरो, गेग्रान बहाव, डुबान तथा सडक र हवाई यातायातमा अवरोध हुनसक्ने भन्दै उच्च जोखिमयुक्त क्षेत्रमा विशेष सावधानी अपनाउन आग्रह गरेका छन्।
विशेषगरी नदी तथा खोलानजिक, पहिरोको जोखिम भएका क्षेत्र र हिमाली क्षेत्रमा थप सतर्कता अपनाउन तथा पानी परिरहेको र रातिको समयमा सकेसम्म राजमार्ग यात्रा नगर्न उनले अनुरोध गरेका छन्।
त्यस्तै, ट्रेकिङ तथा हिमाली क्षेत्रमा जाने योजनामा रहेकालाई मौसममा सुधार नआएसम्म यात्रा स्थगित वा पुनर्विचार गर्न आग्रह गर्दै मौसम विज्ञान विभाग तथा स्थानीय प्रशासनबाट जारी हुने आधिकारिक सूचना नियमित रूपमा हेर्न शाहले अनुरोध गरेका छन्।
शाहले सम्भावित विपद् जोखिम न्यूनीकरणका लागि सम्बन्धित निकायलाई आवश्यक तयारी, समन्वय र पूर्वसतर्कता अपनाउन समेत आग्रह गरेका छन्।
