काठमाडौं, असोज १६ । नेपाल टेलिकमले एनटी फाइबरमार्फत उपलब्ध गराउँदै आएको एनटीटीभी सेवा अब भौतिक सेट–टप बक्सबिनै प्रयोग गर्न सकिने सुविधा ल्याएको छ।
कम्पनीले एन्ड्रोइडमा आधारित स्मार्ट टीभी प्रयोगकर्ताका लागि बिहीबारदेखि (२०८३ असोज १५) ‘भर्चुअल सेट–टप बक्स’ सेवा सञ्चालनमा ल्याएको हो।
नयाँ सुविधाअन्तर्गत ग्राहकले आफ्नो एन्ड्रोइड स्मार्ट टीभीमा गुगल प्लेस्टोरबाट ‘स्मार्ट एनटीटीभी’ एप डाउनलोड तथा इन्स्टल गरी एनटीटीभी सेवा प्रयोग गर्न सक्नेछन्। यससँगै टेलिभिजन सञ्चालनका लागि छुट्टै भौतिक सेट–टप बक्स आवश्यक नपर्ने भएको छ।
नेपाल टेलिकमका अनुसार हाल यो सुविधा एन्ड्रोइडमा आधारित स्मार्ट टीभीमा उपलब्ध छ। निकट भविष्यमा सबै प्रकारका स्मार्ट टीभीमा प्रयोग गर्न मिल्ने गरी सेवा विस्तार गर्ने तयारीसमेत भइरहेको छ।
ग्राहकलाई थप सहज र सुविधाजनक रूपमा टेलिभिजन सेवा उपलब्ध गराउने उद्देश्यले भर्चुअल सेट–टप बक्सको सुविधा ल्याइएको कम्पनीले जनाएको छ।
नयाँ प्याकेज खरिद गर्ने ग्राहकले भर्चुअल सेट–टप बक्ससहितको प्याकेज लिएमा १ हजार रुपैयाँ छुट पाउने व्यवस्था गरिएको छ।
नेपाल टेलिकमले एनटी फाइबरमार्फत एउटै तारबाट टेलिफोन, उच्च गतिको इन्टरनेट र टेलिभिजन सेवा उपलब्ध गराउँदै आएको छ। कम्पनीले भर्चुअल सेट–टप बक्ससहित एनटीटीभी प्रयोग गर्न विभिन्न प्याकेजसमेत उपलब्ध गराएको जनाएको छ।
कम्पनीका अनुसार वार्षिक तथा दुई वर्षे प्याकेज खरिद गर्ने ग्राहकलाई मोबाइल डेटा सुविधासमेत उपलब्ध गराइएको छ।
एनटीटीभीका विभिन्न प्याकेज तथा सेवासम्बन्धी विस्तृत जानकारी नेपाल टेलिकमको वेबसाइट तथा नेपाल टेलिकम एपमार्फत लिन सकिने कम्पनीले जनाएको छ।
