काठमाडौं, कात्तिक १३ । बङ्गालको खाडीमा विकसित चक्रवात ‘अर्नब’ को अवशेष तथा पश्चिमी वायुको आंशिक प्रभावका कारण देशभरको मौसम प्रभावित भएको छ। मौसम पूर्वानुमानअनुसार आज देशका अधिकांश स्थानमा बदली रही मेघगर्जन र चट्याङसहित हल्कादेखि मध्यम वर्षा तथा हिमपात हुने सम्भावना रहेको छ।
आज कोशी, मधेश, बागमती र गण्डकी प्रदेशका धेरै स्थानमा तथा लुम्बिनी, कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित हल्कादेखि मध्यम वर्षा तथा हिमपात हुन सक्ने मौसम पूर्वानुमान महाशाखाले जनाएको छ।
त्यस्तै, कोशी, मधेश, बागमती र गण्डकी प्रदेशका केही स्थानमा भारी वर्षा तथा हिमपात हुने सम्भावना रहेको छ। लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका एक–दुई स्थानमा समेत भारी वर्षा तथा हिमपात हुन सक्ने अनुमान गरिएको छ।
आज राति पनि देशभर सामान्यतया बदली रहनेछ। हिमाली तथा पहाडी भूभागका केही स्थानमा मेघगर्जन र चट्याङसहित हल्कादेखि मध्यम वर्षा तथा हिमपातको सम्भावना रहेको छ। तराईका एक–दुई स्थानमा समेत मेघगर्जन र चट्याङसहित हल्कादेखि मध्यम वर्षा हुन सक्ने पूर्वानुमान गरिएको छ।
मौसम विश्लेषणअनुसार हाल देशमा बङ्गालको खाडीमा विकसित चक्रवात ‘अर्नब’ को अवशेषसँगै पश्चिमी वायुको आंशिक प्रभाव रहेको छ। यसको प्रभाव भोलि अपराह्नदेखि क्रमशः कमजोर हुँदै जाने अनुमान गरिएको छ।
यसअघि पछिल्लो २४ घण्टामा काभ्रेपलाञ्चोक जिल्लाको रोसी मौसम मापन केन्द्रमा सबैभन्दा बढी ५०.२ मिलिमिटर वर्षा मापन भएको थियो। हाल कोशी, बागमती र मधेश प्रदेशका धेरै स्थानमा मध्यम वर्षा भइरहेको छ भने गण्डकी र लुम्बिनी प्रदेशका केही स्थानमा हल्का वर्षा भइरहेको छ।
चक्रवातको सम्भावित प्रभावका कारण नारायणी, बागमती र कोशी नदी जलाधार तथा आसपासका क्षेत्रमा वर्षा बढ्न सक्ने र राजमार्ग आसपासका क्षेत्रमा पहिरोको जोखिम उच्च हुन सक्ने देखिएको छ।
सम्भावित जोखिमलाई मध्यनजर गर्दै धानबाली भित्र्याउनेलगायतका कृषि कार्य समयमै सम्पन्न गर्न, उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम रहेकाले विशेष सतर्कता अपनाउन आग्रह गरिएको छ। पर्यटकलाई उच्च हिमाली क्षेत्रमा यात्रा नगर्न तथा गइसकेकालाई सुरक्षित स्थानमा रहन अनुरोध गरिएको छ।
त्यसैगरी, वर्षाका कारण सडक तथा हवाई यातायात प्रभावित हुन सक्ने, सडक छेउछाउ पहिरो जान सक्ने र चिसो बढ्न सक्ने भएकाले सर्वसाधारण तथा सम्बन्धित निकायलाई आवश्यक पूर्वतयारी र सतर्कता अपनाउन आग्रह गरिएको छ।
