एजेन्सी ९ मंसिर
अर्जेन्टिनाका एक विवाहित जोडीले आफ्नो शरीरमा ९८ वटा परिवर्तन गरेर गिनिज वल्र्ड रेकर्डमा नाम दर्ता गराएका छन् । भिक्टर ह्युगो पेराल्टा र गेब्रिएला पेराल्टाले संसारमा सबैभन्दा धेरै शरीर परिमार्जन गरेका हुन्। उनीहरुले अनुहारदेखि खुट्टासम्म जताततै ट्याटु, प्रत्यारोपण र छेड्ने गरेका छन्।
भिक्टर र गेब्रिएलाको सम्पूर्ण शरीर ट्याटुले छोपिएको छ। उनीहरुले मिलेर ५० वटा बडी पियर्सिङ, ८ माइक्रोडर्मल, १४ वटा बडी इम्प्लान्ट र ५ वटा डेन्टल प्रत्यारोपण गरेका छन् । साथै तिनीहरूसँग ४ कान विस्तारक, २ कान बोल्ट र एक काँटेदार जिब्रो छ । ग्याब्रिएलाले आँखा भित्र ट्याटु पनि बनाएकी छिन् र पूर्ण कालो रंग दिएकी छिन् । तर, भिक्टरका अनुसार जिब्रोमा रंग लगाउनु उनको लागि सबैभन्दा पीडादायी अनुभव थियो।
करिब २४ वर्षअघि अर्जेन्टिनाको ब्यूनस आयर्समा भएको मोटरसाइकल कार्यक्रममा भिक्टर र ग्याब्रिएलाको भेट भएको थियो। यहाँ सँगै समय बिताएपछि उनीहरु एक अर्काको प्रेममा परे । दुवैलाई शरीर परिमार्जन गर्न मनपर्छ। त्यसैले उनीहरूले सँगै बस्ने र आफ्नो शरीरमा ट्याटू र प्रत्यारोपण गर्ने निर्णय गरे। भिक्टरले २००९ मा आफ्नो पहिलो ट्याटु बनाए। यसपछि ग्याब्रिएलाले पनि उनलाई साथ दिएकी थिइन् । आज उनीहरुको विवाह भएको १४ वर्ष पुगेको छ ।
दम्पतीका लागि शारीरिक परिमार्जन कुनै बडी आर्टभन्दा कम होइन । भिक्टरले भनेका छन्,–ट्याटुले मानिसलाई राम्रो वा नराम्रो बनाउँदैन। यो केवल एक कला हो। जीवनको आनन्द लिनुहोस्, यो कलाको आनन्द लिनुहोस्। यो कलाले मेरा धेरै सपनाहरू पूरा गरेको छ, जस्तै २० वटा देशको भ्रमण गर्ने, तिनीहरूको संस्कृति जान्ने र विश्वभर नयाँ साथीहरू बनाउने।’
गब्रिएला र भिक्टरको लागि, शरीर परिमार्जन कलाको अभिव्यक्ति र स्वतन्त्रताको चिन्ह हो। मानिसहरूले उनीहरूको बारेमा के सोच्छन् भन्ने कुराले उनीहरूलाई फरक पार्दैन। उनीहरुको यो रुप देखेर अधिकांश मानिसहरु डराउँछन्, त्यसैले उनीहरुलाई ‘हेल्स एन्जिल्स’ पनि भनिन्छ ।
यो जोडीले सबैभन्दा बढी शरीर परिमार्जनको कीर्तिमान बनाएका छन् । २०१४ मा उनीहरुले ८४ भिन्नता संग गिनिज वल्र्ड रेकर्ड मा प्रवेश गरे । यिनीहरू बाहेक मेक्सिकोकी निवासी मारियाले आफ्नो शरीरको ९९ प्रतिशत भागमा ४९ वटा बडी परिमार्जन र ट्याटु बनाएकोमा सामेल भएकी थिइन् । यस लुकका लागि उनलाई रियल लाइफ भ्याम्पायर पनि भनिन्छ ।
