चितवन । नारायणगढ बजारमा सडक सीमा मिचेर बनाएका संरचनामा सडक डिभिजन कार्यालय भरतपुरले शुक्रबारदेखि डोजर लगाएर भत्काउन सुरु गरेको छ ।
पुल्चोक गोन्द्राङ ६ लेन सडक विस्तारका लागि सडक डिभिजन कार्यालय भरतपुरले शुक्रबार र शनिबार सडक क्षेत्रमा पर्ने संरचना भत्काएको हो ।
पुल्चोक गोन्द्राङ सडक विस्तार अन्तर्गत पुल्चोकदेखि केन्द्रीय बस टर्मिनलसम्म ५८ वटा घरको पिल्लर भत्काएर सडक विस्तारको काम अघि बढाइने सडक डिभिजन कार्यालयले जनाएको छ । शुक्रबार लायन्सचोक र पुल्चोकबीचमा दक्षिणतर्फका घरटहरा भत्काएको कार्यालयले शनिबार सोही ठाउँको सडकको उत्तरतर्फको संरचना भत्काएको छ ।
सडक सीमा मिचेर बनाएको घर, टहरा भत्काउन पटकपटक आग्रह गर्दा पनि नभत्काएपछि डोजर चलाइएको सडक डिभिजन कार्यालयका प्रमुख रमेश पौडेलले बताएका छन् । सडक अतिक्रमण गरेर बनाइएका संरचना भत्काउन दुई पटक सूचना जारी गरिएको थियो । ६ लेन सडक विस्तारको काम सुरु हुँदा ३५ दिने सूचना सार्वजनिक गरेर घर भत्काउन भनिएको थियो । अटेर गरेपछि गत कात्तिक २४ गते १५ दिने सूचना दिइएको पौडेलले बताए ।
बारम्बार सूचना दिँदा पनि अटेर गरेपछि आफैले भत्काउन बाध्य भएको उनले बताए । ‘सुरुमा ३५ दिने, पछि १५ दिने र त्यसपछि पनि समय दिएको हो । कात्तिक २४ गते १५ दिने सूचना दिएको हो । त्यसपछि पनि समय दियौं । सबै घरमा गएर सूचना टाँसेको पनि हो । उहाँहरुले के भत्केला र जस्तो गर्नुभयो । त्यही भएर बाध्य भएर भत्काउन पर्ने अवस्था भयो’, पौडेलले भने ।
सडक विस्तार आयोजनामा ढिलाई हुने भएपछि भत्काउन वाध्य भएको उनको भनाइ छ । ‘जति भने पनि टेर्नु भएन । हाम्रो प्रोजेक्टमै ढिलाई हुने अवस्था भयो । त्यही भएर शुक्रबारबाट सडक क्षेत्रभित्र पर्ने संरचना भत्काउन सुरु गरेका हौं’, उनले भने ।
डोजरले घर, टहरा भत्काउन थालेपछि कतिपय घरधनीले भने आफ्नो संरचना आफैं भत्काएका छन् । सडक विस्तारको काम ठेक्काको म्याद सकिन जम्मा ३ महिना मात्रै बाँकी रहेको अवस्थामा सडक विस्तारका लागि अवरोध गरी बनेका संरचना भत्काउन डिभिजनमाथि दबाव परेको थियो । डिभिजनले सडकको मध्यबाट दुवैतर्फ २५–२५ मिटर आफ्नो सडक क्षेत्र रहने भनेको छ ।
आतंकित बनाइयो : उवासंघ
उद्योग वाणिज्य संघ चितवनले सडक विस्तारको नाममा नारायणगढका नक्सापास एवं निर्माण सम्पन्न प्रमाणपत्र प्राप्त व्यावसायिक भवनमाथि डोजार चलाइएको भन्दै गम्भीर ध्यानाकर्षण भएको जनाएको छ ।
संघले शनिबार पत्रकार सम्मेलन आयोजना गरी सडक डिभिजन कार्यालयले अव्यवस्थित रुपमा संरचना भत्काउने कार्य गरेको भन्दै दुःख व्यक्त गरेको हो । संघका अध्यक्ष चुननारायण श्रेष्ठले राज्यकै एउटा निकायले भवन निर्माणको लागि अनुमति दिने र अर्कोले निर्माण भइसकेको संरचना भत्काउने कार्य गर्नु लज्जास्पद भएको बताए ।
‘राज्यकै कुनै निकायबाट भवन निर्माणको लागि अनुमति प्रदान गर्ने र राज्यकै अर्को निकायबाट निर्माण भइसकेको संरचना भत्काउने कार्य लज्जास्पद रहेको संघले महसुस गरेको छ’, उनले भने । घरधनी आफैंले मापदण्ड विपरीतका संरचना भत्काउँदै गरेको अवस्थामा नगरको सुन्दरता बिग्रिने र भवनको बाँकी संरचना समेत कमजोर हुने गरी डोजर चलाइएको भन्दै तत्काल उक्त कार्य रोक्न अध्यक्ष श्रेष्ठले माग गरे । श्रेष्ठले मापदण्ड विपरीत बनेका संरचना भत्काउने सवालमा उद्यमी, व्यवसायीलाई व्यवस्थित हुने समय नदिइएको आरोप लगाए ।
व्यवसायीलाई व्यवस्थित हुन समय उपलब्ध गराउने विषयमा सरोकारवालसँग समन्वय गर्ने भनिएकोमा अप्रत्यासित रुपमा संरचना भत्काउने कार्य भएको उनले बताए । यसले व्यवसायीहरुको सामानमा क्षति पुगेको उनको भनाइ थियो । ‘सडक डिभिजन कार्यालयका प्रमुखज्यू र भरतपुर महानगरपालिकाका उपप्रमुखज्यूबाट संरचना सवालमा पेटीमा मात्र डोजर लगाउने र अन्य संरचनामा क्षति हुने तवरले कार्य नगर्ने भनी संघका प्रतिनिधिलाई आश्वासन दिए पनि अव्यवस्थित रुपमा संरचना भत्काउने कार्य भइरहेको छ’ उनले भने ।
अव्यवस्थित तरिकाले संरचना भत्काउँदा व्यवसायीको सामान यत्रतत्र छरिएको, बैंक तथा वित्तीय संस्थाका एटिएम मेसिन, लकरमा समेत क्षति पुगेको भन्दै संघले उक्त कार्यको घोर भत्र्सना गरेको छ । संघका अध्यक्ष श्रेष्ठले घरको पेटी र टप मात्रै भत्काउने सहमति भए पनि सटर समेत भत्काइएको भन्दै खेद प्रकट गरे । यसले कोभिड–१९ ले वित्तीय क्षेत्रमा देखिएको जटिलता र बैंक ब्याजदरमा भएको वृद्धिले थलिएका व्यवसायीहरुलाई थप आतंकित र हतोत्साही गराएको उनले गुनासो गरे ।
विकासका लागि आवश्यक पूर्वाधारहरु निर्माण दीर्घकालीन र आवश्यक समन्वयमा हुनुपर्छ भन्ने संघको मान्यता रहेको भन्दै पेटीमा मात्र डोजर लगाउने र अन्य संरचनामा क्षति हुने तवरले कार्य नगर्ने आश्वासन दिएर अव्यवस्थित रुपमा संरचना भत्काउनु दुःखद भएको उनको भनाइ थियो ।
