चितवन, ८ माघ ।
अंग्रेजीमा एउटा भनाइ छ, ‘पहिलो प्रभाव नै अन्तिम प्रभाव हो ।’ त्यसैले त मानिसहरु बढी आउजाउ गर्ने थलोमा सुन्दरतामा जोड दिइन्छ । यही तथ्यलाई मनन् गरी भरतपुर विमानस्थलको सौन्दर्यतामा जोड दिइएको छ । पहिलेको तुलनामा अहिले भरतपुर विमानस्थलको बाहिरी सौन्दर्य लोभलाग्दो बनेको छ ।
व्यवस्थित पार्किङ, प्रवेशद्वारको दाहिनेतिर स्टोन फाउन्टेन र भुइँमा फूलको क्यारी अनि देब्रेतिर हरियाली र गमलामा सजाइएका मौसमी फूलहरु । पहिलोपटक विमानस्थल छिर्ने पर्यटकको मन छुन पर्याप्त छन् यी दृश्य । जहाज कुर्न बनाइएको प्रतीक्षा कक्षमा सोफाजस्तै सुविधाजनक कुर्सी । कफी सप । आडैमा भिआइपी कक्ष । सँगै छ स्तनपान कक्ष अनि अलिकति उता छ वृद्धवृद्धा, अपांगता भएकाहरु र बिरामीका लागि बनाइएको सोफासेट र टिटेबुलसहितको कक्ष । यस कक्षभित्रै शौचालयको व्यवस्था गरिएको छ । आम यात्रुलाई भने छुट्टै शौचालय छ । सुरक्षा जाँच पास गरेपछि विमान कुरेर बस्ने डिपार्चर कक्ष पनि कुर्सीहरुले सजिसजाउ पारिएको छ । विमानसम्म पुग्ने बाटो सफा देखियो ।
विमानबाट झरेपछि आउनु पर्ने यात्रु आगमन (अराइभल) कक्षको दाहिनेतिर बच्चासहितको माउ गैँडाको मूर्ति । मूर्तिको अगाडि वन्यजन्तु र थारु सँस्कृति सम्झाउने भित्तेचित्र । ती चित्रको ठीक माथितिर निलो रंगका अक्षरमा लेखिएको छ, ‘वेलकम टु भरतपुर एयरपोर्ट ।’ त्यहीँनिर ठडिएको छ नेपालको राष्ट्रिय झण्डा ।
भरतपुर विमानस्थलको फेरिएको रुपबारे जानकारी दिँदै विमानस्थलका निमित्त प्रमुख दीपक विक भन्छन्, ‘हामीले अहिले हवाई सुरक्षा र विमानस्थलको सौन्दर्यकरणमा जोड दिएका छौँ । अहिलेको यो रुप दुई महिनादेखिको मिहिनेतको फल हो ।’ चार महिनाअघि भरतपुर विमानस्थलमा निमित्त प्रमुखको जिम्मेवारीमा आएका विक आफू आएपछि विशिष्ट कक्ष र स्तनपान कक्ष थप व्यवस्थित बनाइएको बताउँछन् । विमानस्थलमा विशिष्ट व्यक्तिहरुको आगमन हुँदा प्रयोगमा ल्याउने गरी पत्रकार सम्मेलन कक्ष संचालनमा आएको पनि दुई महिना भएको छ ।
‘एयरपोर्टलाई वरपरबाट घेरिएको तारजालीमा झुत्तिएका झाल र लहरालाई हटाएर सफा बनाएका छौँ’ विकले भने, ‘मैदानमा रहेका झाडी र घाँस पनि काटेर सिनित्त पारिएको छ । अहिले चराचुरुङ्गी र स्याललगायतका वन्यजन्तु देखिन छाडेको छ । यसले हवाई सुरक्षा बढाएको छ ।’ पछिल्लो समय भरतपुर महानगरसँगको समन्वयमा मापदण्ड विपरीतका संरचना (अग्ला भवन, छतमा ट्रस) निर्माणमा कडाई गरिएको उनले जानकारी दिए ।
हेर्नुहोस् तस्बिरहरु :
तस्बिरहरु : सूर्यप्रकाश कँडेल
