चितवन, ५ भदौ
प्रोफेसनल मिडिया ग्रुप अन्तर्गत वेदान्त मल्टीप्रपोज कम्पनीद्वारा सञ्चालित नवीन खबर डट कमको प्रधान सम्पादकमा चितवनका वरिष्ठ पत्रकार सूर्यप्रकाश कँडेल नियुक्त भएका छन् । पत्रकार कँडेललाई कम्पनीका प्रबन्ध निर्देशक नवीनराज पौडेलले खादा ओढाएर नियुक्तिपत्र दिई नवीन खबरको कार्यालयमा स्वागत गरेका हुन् ।
चितवनको पत्रकारिता क्षेत्रमा २०५५ सालदेखि निरन्तर क्रियाशील प्रधान सम्पादक कँडेलले छापा र विद्युतीय पत्रकारिताका विभिन्न क्षेत्रमा काम गरिसकेका छन् । चितवन सन्देश साप्ताहिकबाट सुरु भएको कँडेलको पत्रकारिता यात्रा चितवन पोष्ट दैनिक, आदर्श समाज दैनिक, अन्नपूर्ण पोष्ट दैनिक, पारदर्शी दैनिक, ड्रिम्स दैनिक हुँदै पछिल्लो समय नवीन खबर डट कमसम्म आइपुगेको छ ।
विशेषगरी फिचर लेखनमा दख्खल राख्ने पत्रकार कँडेल भाषा र समाचार सम्पादनमा पनि पोख्त छन् । चितवनको भरतपुरलाई आफ्नो कर्मभूमि बनाएका कँडेलले एफएम रेडियोदेखि टेलिभिजनको समाचार शाखामा समेत काम गरिसकेका छन् । उनी हाल कायाकैरन दैनिककको समेत प्रधान सम्पादक रहेका छन् ।
नवीन खबर डट कममा नवनियुक्त प्रधान सम्पादक कँडेलले आफ्नो सम्पादकीय नेतृत्वमा नवीन खबरलाई पत्रकारिता क्षेत्रकै नवीन उदाहरण बनाउने प्रतिवद्धता जनाए । उनले पत्रकार आचारसंहिताको पूर्णपालना गर्दै सत्य र तथ्य समाचार सन्तुलितरुपमा पस्किने काममा नवीन खबरको टिम सक्रिय रहने बताए ।
नवीन खबर डट कमको संचालक संस्था वेदान्त मल्टीप्रपोजका प्रबन्ध निर्देशक नवीनराज पौडेलले चितवनका अग्रज पत्रकारको सम्पादकीय नेतृत्वमा नवीन खबरले पत्रकारिताको क्षेत्रमा नयाँ उचाई हासिल गर्ने अपेक्षा लिइएको बताए । उनले प्रधान सम्पादक कँडेललाई बधाई ज्ञापन गर्दै कार्यकाल सफलताको शुभकामना व्यक्त गरे ।
प्रधान सम्पादक कँडेलको स्वागत कार्यक्रममा भरतपुर पोष्ट डट कमकी सम्पादक दीपा गौतम, प्रोफेसनल मिडिया ग्रुपकी लेखापाल संगिता अधिकारी, बजार शाखाका मुक्ति सुवेदी, रेडियो भरतपुरका प्राविधिक अमरसिंह थापालगायतको उपस्थिति थियो ।
