काठमाडौं । सरकारले आगामी फागुन २१ गते हुने प्रतिनिधिसभा सदस्य निर्वाचनका लागि निर्वाचन प्रहरी भर्ना खुला गरेको छ।
निर्वाचन प्रहरी बन्न इच्छुक व्यक्तिले आज (शुक्रबार)देखि माघ १ गतेसम्म दरखास्त दिन सक्नेछन् । दरखास्त बिहान १० बजेदेखि अपराह्न ४ बजेसम्म सम्बन्धित जिल्ला प्रहरी कार्यालयमा बुझाउन सकिने सूचनामा उल्लेख छ ।
यसअघि ‘म्यादी प्रहरी’ भनिँदै आएको सेवालाई यसपटक ‘निर्वाचन प्रहरी’ नाम दिइएको छ। निर्वाचन प्रहरी (म्यादी प्रहरी) को भर्ना खुलेपछि भद्रकालीस्थित काठमाडौं प्रहरी परिसरमा युवाहरू फारम भर्न लाइन लागेका छन्।
नेपाल प्रहरीको मानवस्रोत विकास विभागले जारी गरेकाे सार्वजनिक सूचनामार्फत एक लाख ३३ हजार ९८० जना निर्वाचन प्रहरी आवश्यक पर्ने जनाएको छ। सार्वजनिक बिदाका दिनमा पनि आवेदन लिइनेछ। निर्वाचन प्रहरीलाई खटिएको स्थानमा आउजाउको तयारीस्वरूप एकपटकका लागि ८४६ रुपैयाँ तयारी खर्च उपलब्ध गराइनेछ। साथै, प्रतिदिन ३०० रुपैयाँका दरले चार दिनको एकमुष्ट १२०० रुपैयाँ खाजा खर्च प्रदान गरिने जनाइएको छ।
निर्वाचन प्रहरीको छनोट प्रक्रिया प्रमुख जिल्ला अधिकारीको संयोजकत्वमा जिल्लास्तरीय समितिमार्फत सञ्चालन हुनेछ।
