काठमाडौं । युवा तथा खेलकुद मन्त्री बब्लु गुप्ताको प्रस्तावित अमेरिका भ्रमण विवादमा परेको छ। गैरआवासीय नेपाली संघ (एनआरएनए) राष्ट्रिय समन्वय परिषद् अमेरिकाले मन्त्री गुप्तालाई कुनै पनि कार्यक्रमका लागि आमन्त्रण नगरेको स्पष्ट पारेको छ।
एनआरएनएको एक पक्षले मन्त्री गुप्तालाई कुनै पनि कार्यक्रमका लागि आमन्त्रण नगरिएको जनाएको छ भने अर्को पक्षले भने औपचारिक कार्यक्रमका लागि निमन्त्रणा गरिएको दाबी गरेको छ। दुवै पक्षबाट जारी भएका अलग–अलग विज्ञप्तिले एनआरएनएभित्रको गहिरो आन्तरिक विवाद प्रस्ट पारेको छ।
यसैबीच, गैरआवासीय नेपाली संघ अमेरिका (एनआरएनए एसीसी युएसए)ले जारी गरेको प्रेस विज्ञप्तिमा युवा तथा खेलकुद मन्त्री बब्लु गुप्तालाई अमेरिकामा कुनै पनि कार्यक्रममा बोलाइएको छैन भन्ने उल्लेख गरिएको छ। उक्त विज्ञप्तिमा एनआरएनए प्रवक्ताका रूपमा सन्देश उप्रेतीको हस्ताक्षर रहेको छ।
जारी विज्ञप्तिमा संस्थाको नाम, ईआईएन नम्बर तथा डिजिटल पहिचानको दुरुपयोग गर्दै अनधिकृत कार्यक्रम र मानव तस्करीजस्ता गम्भीर गैरकानुनी गतिविधि भइरहेको दाबी गरिएको छ।
